Սահմանադրական դատարանն այսօր քննում է «Ռոբերտ Քոչարյանի դիմումի հիման վրա՝ Հայաստանի Հանրապետության քրեական դատավարության օրենսգրքի 135-րդ հոդվածի 2-րդ մասի և 35-րդ հոդվածի՝ Սահմանադրությանը համապատասխանության հարցը որոշելու վերաբերյալ» հարցը:
Միաժամանակ, նախքան դիմումի քննությունը բողոքի տարբեր ակցիաներ են ընթանում Սահմանադրական դատարանի դիմաց: Ավելի մեծաթիվ ցույց են անում Ռոբերտ Քոչարյանի կողմնակիցները։
Ամբողջ խնդիրն այն է, որ Քոչարյանն ու նրա կողմնակիցները հաճախ Նիկոլ Փաշինյանին մեղադրում են դատարանների նկատմամբ ճնշում բանեցնելու համար։ Այսօր ՍԴ դահլիճում լրագրողներին տված հարցազրույցում նման տեսակետ է հնչեցրել նաև Ռոբերտ Քոչարյանի որդին՝ Լևոն Քոչարյանը։
Բնավ այն կարծիքին չենք, որ, օրինակ, դատարանների շենքերն արգելափակելու՝ Նիկոլ Փաշինյանի որոշումն ամենաարդյունավետն ու ռացիոնալն էր, սակայն եթե Քոչարյանի թիմը դա համարում է ճնշում դատարանի հանդեպ, ապա առնվազն բարոյական իրավունք չունի անելու քայլեր, որոնք կարող են որակվել որպես ճնշում դատարանի նկատմամբ։
Ավելին՝ այդ մարտավարությունը Քոչարյանի թիմը կիրառում է շատ ավելի վաղ, քան Փաշինյանը նախաձեռնեց դատարանների շենքերի մուտքերի արգելափակումը։ Առաջին ատյանի դատավորը, օրինակ, երկրորդ նախագահի խափանման միջոցը փոխեց, երբ դատարանի շենքը շրջափակված էր Քոչարյանի կողմնակիցների կողմից։ Դժվար է ասել՝ ճնշման այդ ագրեսիվ ձևն ինչպիսի ազդեցություն է ունեցել դատավորի որոշման վրա։
Կամ այսօր Քոչարյանի կողմնակիցներն իրենց ագրեսիվ են պահում ՍԴ շենքի մոտ, որն ակնհայտորեն Բարձրագույն դատարանի կամ սահմանադրական արդարադատության նկատմամբ ճնշման դրսևորում է։ Կամ էլ՝ Քոչարյանի թիմը զբաղված է քարոզչական իմիտացիայով, այլ խոսքով՝ «մասովկան» ընդամենը քողածածկույթ է, որը պետք է լեգիտիմացնի Քոչարյանի օգտին կայացվող ՍԴ հնարավոր որոշումը։
Ամեն դեպքում՝ փողոցը կամ ամբոխն իրավունք չունի կանխորոշելու դատարանի որոշումը։ Սա ակնհայտ ճշմարտություն ու աքսիոմ է՝ անկախ այն բանից, թե ով կամ ինչ նպատակներով է ուղղորդում փողոցը։ Քոչարյանի կողմնակիցները Փաշինյանին մեղադրում են դատարանների վրա ճնշում բանեցնելու համար, սակայն հենց իրենք են «փողոցային արդարադատության» հիմնական ջատագովները։ Նույն հաջողությամբ մենք կարող ենք Քոչարյանին ու նրա կողմնակիցներին մեղադրել ՍԴ վրա ճնշում բանեցնելու համար։
Լուսանկարը՝ Armeniasputnik-ի