Օգոստոսի 31-ին ՀՀ ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի մասնակիցները հանդիպել են Սփյուռքի գործերի գլխավոր հանձնակատար Զարեհ Սինանյանին: Այս մասին հաղորդում են ՀՀ ԱԳՆ-ից:
Մասնակիցներին ուղղված խոսքով հանդես են եկել ԱԳ նախարար Զոհրաբ Մնացականյանը և Սփյուռքի գործերի գլխավոր հանձնակատար Զարեհ Սինանյանը:
Կարևորելով նման ձևաչափով հանդիպման անցկացումը՝ նախարար Մնացականյանը նշել է.
«Բավական ընդարձակ քննարկումներ ենք ունեցել կառավարության ներսում, վարչապետի հետ, թե ինչպես է ձևավորվում սփյուռքի հետ մեր աշխատանքները կազմակերպելու ինստիտուցիոնալ համակարգը: Մենք ամրագրեցինք համահայկականության սկզբունքն արտաքին քաղաքականության մեջ: Ինստիտուցիոնալ առումով ես կարծում եմ, որ մենք առաջին հերթին ունենք ձևավորված փորձ և հիշողություն:
Մեր դեսպանություններն անմիջականորեն հանդիսանում են այն օղակը, որ առօրյա, անմիջական շփման մեջ է սփյուռքի հետ:
Սփյուռքի հսկայական ներուժն արտահայտվում է թե՛ Հայաստանի զարգացման օրակարգում, թե՛ միջպետական հարաբերությունների ձևավորման հարցում և թե՛ համահայկականության սկզբունքը համալրելու, նրան աջակցելու և նպաստելու մեջ ունեցած դերակատարությամբ»:
Շնորհակալություն հայտնելով դիվանագիտական ծառայության մարմինների ղեկավարների հետ երկխոսելու համար ընձեռված հնարավորության համար՝ Զարեհ Սինանյանը կարևորել է հանդիպման անցկացումը Սփյուռքի գործերի գլխավոր հանձնակատարի գրասենյակի և արտաքին քաղաքական գերատեսչության միջև համագործակցության մասին բաց զրույց անցկացնելու համար:
Տեղի է ունեցել մտքերի հանգամանալից քննարկում ՀՀ արտաքին քաղաքականության հիմնարար սկզբունքների և Հայաստան-Արցախ-Սփյուռք փոխգործակցության ընդլայնման ու խորացմանն ուղղված հարցերի շուրջ:
