Ենթադրվում էր, որ Ամուլսարի խնդիրը կթակի նաև խորհրդարանական խմբակցությունների դռները, որովհետև ինչքան էլ որոշումը պետք է ընդունի կառավարությունը, պատասխանատվությունը կիսում է նաև խորհրդարանը: Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Հովիկ Աղազարյանը, ԲՀԿ խմբակցության պատգամավոր Սերգեյ Բագրատյանը և «Լուսավոր Հայաստան» խմբակցության պատգամավոր Հարություն Բաբայանը:
Ամուլսարի խնդրի առնչությամբ առայժմ ոչ հստակ հայտարարություններ են հնչում խմբակցությունների ներկայացուցիչների կողմից: «Բոլորս էլ սպասում ենք կառավարության կողմից ամբողջական ինֆորմացիայի: Ամեն դեպքում մենք ի սկզբանե ասել ենք, որ հանքարդյունաբերությունը չէ, որ պետք է կերտի ՀՀ ապագան: ՀՀ ապագան մարդկային ռեսուրսի, ժամանակակից նորարարական տեխնոլոգիաների ու գյուղատնտեսության զարգացման և վերականգնվող էներգիայի աղբյուրներ ունենալու մեջ է»,- նշեց Հ. Բաբայանը: Նա նաև հավելեց, որ Ամուլսարի հարցը նոր իշխանության ամենավատ ժառանգություններից մեկն է: Պատգամավորի կարծիքով՝ այս խնդրի շուրջ հասարակության և իշխանության միջև բաց դիսկուրսի կարիք կա: «Կառավարության դիրքորոշումն այսպիսին է՝ մենք ինչ-որ բան գիտեք, բայց հիմա չենք ասում, հետո կիմանաք: Դա ճիշտ չէ, պետք է բաց քննարկում լինի»: Հ. Բաբայանը նաև հավելեց. «Դժվար է տեսնել նեգատիվ պրոբլեմները և ասել՝ թող հանքը շահագործվի»:
Հ. Աղասարյանը չհերքեց այն, որ «Իմ քայլը» խմբակցության ներսում խնդրի շուրջ տարբեր կարծիքներ ունեն: Նրա խոսքով՝ կառավարությունում միակարծիք են. «Միանշանակ է, որ չունենք հիմք հանքը չշահագործելու. հանքը աշխատող է, և աշխատանքը կասեցված է, հիմք չունենք փակելու»:
Բ. Ասատրյանն ընդգծեց, որ դեռևս 2017-ին ԲՀԿ-ն հանդես է եկել Ամուլսարի շահագործմանը դեմ՝ հիմք ունենալով երեք աշխարհահռչակ ընկերությունների (ամերիկյան, ավստրալական, կանադական) բացասական եզրակացությունները: «Հիմա ի՞նչ է փոխվել, որ դեմ չլինենք»,- նշեց պատգամավորը:
Մանրամասն՝ տեսանյութում:
