«Առաջին լրատվական»-ի զրուցակիցը Պահպանողական կուսակցության նախագահ Միքայել Հայրապետյանն է։
–Պարոն Հայրապետյան, ՌԴ գլխավոր դատախազությունը մերժել է ՀՀ ԱԺ նախկին պատգամավոր Միհրան Պողոսյանին քրեական հետապնդման ենթարկելու նպատակով հանձնելու մասին ՀՀ գլխավոր դատախազության միջնորդությունը: Այսինքն՝ Մոսկվան չի արտահանձնի Միհրան Պողոսյանին: Ըստ Ձեզ, ի՞նչ հետևանքներ կունենա այս որոշումը։
-Ոչ մի հետևանք էլ չի ունենա: Լավագույն հետևանքն այն կլիներ, որ վերջապես մեր հանրային գիտակցության մեջ մտներ այն, որ հայ սպայության մասին մեծ վերապահությամբ կարող ենք խոսել, դրանց մեծագույն մասը Ռուսաստանի «կադրերի տրամադրության տակ» է:
– Արդյո՞ք Ռուսաստանն այս քայլով հարվածում է նոր իշխանություններին։ Այս հանգամանքը կապ ունի՞ Մարտի 1-ի գործի քննության հետ։ Հատկապես, երբ միջազգային մամուլում էլ արտահոսք եղավ, որ 2008թ. մարտի 1-ին Արցախից գեներալ Սամվել Կարապետյանի գլխավորությամբ զորք է բերվել Երևան։
-Ավետարանում ասվում է, որ տերևն անգամ չի շարժվի՝ առանց Բարձրյալի կամքի: Հիմա, ո՞վ է ինչ-որ գեներալ (մանավանդ քիչ առաջ ասացի, թե ում կադրերի տրամադրության տակ են նրանք), որ հանդգներ առանց մետրոպոլիայի հանձնարարության զինական տեղաշարժ կատարել: Մարտի 1-ը մինչև վերջ չի բացահայտվելու, քանի դեռ մեր երկիրը լիակատար անկախ չէ և գտնվում է հրամաններ տալու լիազորություն ունեցող ռուսականի ուղեծրում:
–Քոչարյանի փաստաբան Հովհաննես Խուդոյանը Հայաստանի հանրային հեռուստաընկերության «Լուրերին» տված հարցազրույցում հայտարարել էր, թե ազատագրված տարածքները Արցախի Հանրապետության մի մաս են կարող համարվել ապրիորի: Ըստ Ձեզ, ի՞նչ է նշանակում այս հայտարարությունը։
– Նշանակում է, որ նույնիսկ հայրենասիրությունն էլ չէ սինլքորների վերջին ապաստանը: Սա մեսիջ էր դրսերին, թե՝ պատրաստ ենք, բայց մի՛ զոհաբերեք մեզ: Իսկ փաստաբաններին վիրավորել պետք չէ. նրանք իրենց պաշտպանյալների համար պարտավոր են անել հնարավոր ամեն ինչ, կատարել ցանկացած ցուցում:
–Ի՞նչ պիտի անի Նիկոլ Փաշինյանի ղեկավարած ուժը ներքին և արտաքին մարտահրավերներին դիմագրավելու համար։
-Օ՜, դա պարոն Փաշինյանի և իր ղեկավարած ուժի խնդիրն է: Լուսանցքից ամենապարզ դիտարկումներն անգամ հիվանդագին ու թշնամաբար են ընդունվում, որքանով նկատել եմ: Մենք առայժմ միայն հաջողություններ կարող ենք մաղթել այդ ծանրածանր խաչը տանելու գործում:
