Լուրեր
Մարտի 1-ի գործով ինչ զարգացումներ են և ինչու BBC-ի հրապարակումը եղավ 11 տարի անց. այլ խաղ է գնում
  • 17:00
  • 2019-08-14
  • Դիտումներ՝ *

Վարչապետ Նիկոլ Փաշինյանն օրերս կառավարությունում հանդիպել է Մարտի 1-ի զոհերի հարազատներին: Փաշինյանն անդրադարձել է կառավարության վերջին նիստում ընդունված որոշմանը՝ Մարտի 1-ի տուժողների իրավահաջորդներին դրամական աջակցություն տրամադրելու վերաբերյալ: Թեմայի շուրջ «Առաջին լրատվական»-ի հետ քնարկմանը մասնակցեցին ՀԱԿ իրավական հանձնաժողովի ներկայացուցիչ Արմեն Խաչատրյանը, «Անտարես» հրատարակչության տնօրեն Արմեն Մարտիրոսյանը, Մարտի մեկին զոհված Գոռ Քլոյանի հայրը՝ Սարգիս Քլոյանը:

Սարգիս Քլոյանը նշեց, որ կառավարությունը նախատեսում է 30մլն դրամ աջակցություն տրամադրել Մարտի 1-ի տուժողների իրավահաջորդներին, բայց եթե ՄԻԵԴ-ը որոշի 240 000 եվրո տրամադրել, այդ դեպքում 30 մլն-ն վերադարձվելու է:

Որոշ մարդկանց, այսպես ասած, տակնուվրա արեց Մարտի 1-ի քրեական գործի վերաբերյալ BBC-ի հրապարակումը. նրանք շեշտադրում են ոչ թե բովանդակությունը, այլ այն, որ իրենց կարծիքով՝ տեղեկատվության արտահոսք է եղել: Անդրադառնալով այս դիտարկմանը՝ քննարկման մասնակիցները նշեցին, որ այդ հրապարակման մեջ նորություն չկար: Արմեն Խաչատրյանն ընդգծեց, որ հրապարակման մեջ նշված փաստերը հայտնի են եղել 2008թ-ից. «Մի մասը գուցե օբյեկտիվորեն չէր հավատում այս տեղեկություններին, և հիմա հանդիպում են փաստաթղթավորված ապացույցների, որոնց հնարավոր չէ չհավատալ: Մյուս մասն ընդամենը սկսում է շահարկել, թե ինչու, ինչպես եղավ արտահոսքը: Ես այդ մարդկանց ողջախոհության կոչ եմ անում…»:

BBC-ի հրապարակումից հետո պնդումներ եղան, որ սլաքներն ուղղվում են Սերժ Սարգսյանի դեմ: Արմեն Մարտիրոսյանի խոսքով՝ Սերժ Սարգսյանը Մարտի 1-ի գլխավոր շահառուն է. «Սերժ Սարգսյանն ավելի մեծ շահառու է, քան Ռոբերտ Քոչարյանը, որ Մարտի 1-ի, սահմանադրական կարգի տապալման թիվ մեկ պատասխանատուն է»: Ա. Խաչատրյանը հավելեց, որ Մարտի 1-ի շահառուն եղել է ռոբասերժական ռեժիմը:

«Ինձ հետաքրքիր է, թե ինչու BBC-ի հրապարակումը եղավ 11 տարի անց,- նշեց Ա. Մարտիրոսյանը,- ուրեմն այսօր ձեռնտու է հեռարձակելը, ուրեմն այլ խաղ է գնում»:

Մանրամասն՝ տեսանյութում:

  • Դիտումներ՝ *