Այս օրերի լրահոսում կարծեք թե աննկատ մնաց սահմանադրական փոփոխություններ սկսելու նախաձեռնությունը. դա ավելի ակտուալ չէ՞, քան այն, ինչ տեղի է ունենում այսօր: «Առաջին լրատվական»-ի հետ զրույցում ԱԺ «Լուսավոր Հայաստան» խմբակցության պատգամավոր Արման Բաբաջանյանը նշեց. «Կարծում եմ, որ սահմանադրական փոփոխությունները ֆունդամենտալ նշանակություն կունենան մեր երկրի զարգացման համար, դա մի հարց է, որը շատ ավելի վաղուց պետք է տեղ գտներ մեր քաղաքական անելիքների մեջ, և լավ է, որ Արդարադատության նախարարությունն այդպիսի նախաձեռնությամբ է հանդես եկել: Այդպիսի գործընթաց էր սկսվել նաև ԱԺ-ում՝ ԱԺ նախագահի նախաձեռնությամբ, և այն շարունակություն չունեցավ: Իշխանության խոստումների և գործողությունների միջև ընդհանրապես կա որոշակի խզում, հույս ունեմ, որ այս նախաձեռնությունը դրանցից մեկը չէ»:
Պատգամավորի խոսքով՝ հեղափոխությամբ իշխանության եկած թիմը չի կարող նախկին իշխանությունների համար «կարված» Սահմանադրությունով լիարժեքորեն իրագործել այն նպատակները, որոնք նրանց մղել են հեղափոխություն իրականացնելու, և արդյուավետորեն կատարել հանրությանը տրված խոստումները: «Շատ կուզեի, որ սահմանադրական փոփոխությունները չվերաբերեին միայն ՍԴ-ին և այն փոփոխություններին, որոնց մասին վարչապետն իր վերջին հարցազրույցում նշեց: Մենք գտնում ենք, որ համալիր հարցեր կան կառավարման համակարգի վերաբերյալ, որոնց լուծում տալն օրախդիր են: Առայժմ հայտնի չեն սահմանադրական փոփոխությունների նպատակները և փոփոխությունների շրջանակը»,- նշեց Ա. Բաբաջանյանը:
Անդրադառնալով BBC-ի ռուսական ծառայության հրապարակած տեղեկատվությանը, պատգամավորը նշեց, որ այնտեղ որևէ նորություն չկար, հայաստանյան մամուլում բազմիցս նշվել է այդ մասին: Ա. Բաբաջանյանի խոսքով՝ իհարկե, ազգային անվտանգության խնդիր է այդպիսի տեղեկությունների հասանելիությունը օտարերկրյա լրատվամիջոցին, բայց այդպիսի արտահոսքերից որևէ երկիր չի խուսափում, անգամ ԱՄՆ-ը. «Որոշ քաղաքական շրջանակներ փորձում են այս առիթն օգտագործել և բուն բովանդակությունից շեղվել… Քաղաքական շահառուներ կան և՛ դրսում և երկրի ներսում»: Պատգամավորի դիտարկմամբ՝ այս զարգացումներով փորձ է արվում հնարավորինս ստվերել կարևոր իրադարձությունը՝ Ստեփանակերտում ՀՀ վարչապետի ուղերձի հիմնական ասելիքը:
Խոսելով դատաիրավական համակարգին առնչվող խնդիրների շուրջ և անդրադառնալով հարցին, թե արդյոք վեթինգի հարցն օրակարգից դուրս է եկել՝ պատգամավորն ընդգծեց. «Մայիսի 20-ին վարչապետն իր ելույթում խոսեց վեթինգի և անցումային արդարադատության մասին՝ նշելով, որ պետք է «վիրահատական» միջոցներով գնալ դատական համակարգի առողջացմանը, և ցավալի է, որ իշխանությունը՝ ինքը, հրաժարվեց այդ խոստումն իրագործելուց, այդ նպատակից… Նույնը վերաբերում է նաև անցումային արդարադատությունը, որի մասին Փաշինյանը խոսեց իր հարյուրօրյա գործունեությունն ամփոփելիս, բայց այդ մասին վերջին հարցազրույցում, ելույթներում ոչինչ չենք լսում և չենք տեսնում, որ այդպիսի նպատակ կա: Նիկոլ Փաշինյանով, թե առանց նրա, անցումային արդարադատությունից չենք կարող խուսափել, եթե նա չանի, դա անելու է հաջորդ իշխանությունը: Հանրությունը սպասում է 20 տարի շարունակ կեղեքողների պատասխանատվության ենթարկվելուն»:
Մանրամասն՝ տեսանյութում:
