Ղրղզստանի ուժայինները նոր գրոհ են սկսել Չույսկի մարզի Կոյ-Տաշ գյուղում երկրի նախկին նախագահ Ալմազբեկ Աթամբաևի նստավայրի վրա:
Ղրղզստանի նոր իշխանությունները Աթամբաևին մեղադրում կոռուպցիայի մեջ, նախկին նախագահը մեղադրանքները համարում է քաղաքականապես պատճառաբանված՝ տեղեկացնում է BBC-ն:
«Եվս մեկ գրոհ է սկսվել նստավայրի վրա, լսվում են կրակոցներ և կիրառվում են լուսաաղմկահան նռնակներ»,- TASS-ը մեջբերել է նախկին նախագահի շտաբի ներկայացուցչի խոսքը: Նրա խոսքով՝ Աթամբաևի կողմնակիցները քարեր ու փայտեր են նետում հատուկ նշանակության ուժերի աշխատակիցների վրա: Նախկին նախագահի շտաբից նաև հայտնել են, որ Աթամբաևի կողմնակիցները չեղարկել են օգոստոսի 8-ին Բիշքեկում ծրագրված հանրահավաքը և վերադառնում են Կոյ-Տաշ:
Օգոստոսի 8-ի առավոտյան Աթամբաևը հայտարարել էր, որ մտադիր է իր կողմնակիցների անժամկետ հանրահավաք սկսել Բիշքեկում գործող նախագահի պաշտոնաթողության պահանջով: Օգոստոսի 7-ին Ղրղզստանի հատուկ ծառայությունները Աթամբաևին ձերբակալելու փորձ են ձեռնարկել:
Սակայն նախկին նախագահին պաշտպանել են նրա կողմնակիցները, և ուժայիններին չի հաջողվել ձերբակալել Աթամբաևին: Գործողության ընթացքում տուժել է ավելի քան 70 մարդ, մահացել է հատուկ ջոկատայիններից մեկը:
Ղրղզստանի խորհրդարանի պատգամավորներն առաջարկել են երկրում արտակարգ դրություն մտցնել Աթամբաեւի շուրջ ծավալված իրադարձությունների կապակցությամբ: Ղրղզստանի նախագահ Սոորոնբայ Ժեենբեկովը օգոստոսի 8-ին խորհրդարանի արտահերթ նիստում հայտնել Է, որ նախկին նախագահ Աթամբաեւի կարգավիճակը Կոյ-Տաշ գյուղի իրադարձություններից հետո վկայից կփոխվի ծանր հանցագործության կատարման մեջ մեղադրվողի:
