Ազովի ծովի արևմտյան ափերին մեդուզաների հայտնվելը, որոնք հեղեղել են ափամերձ հատվածը, մտահոգություն է առաջացրել զբոսաշրջիկների և տեղի բնակիչների շրջանում:
Արդեն մի քանի օր է, սոցցանցերում տեսանյութեր են հայտնվում, որտեղ կարելի է տեսնել Ազովի ծովում սատկած մեդուզաների մեծ կուտակումները, ինչի հետևանքով ջուրը փոխել է գույնը: Զբոսաշրջիկները և տեղի բնակիչները չեն կարողանում ջուրը մտնել և փորձում են գուշակել ափերը ծածկող կենդանիների զանգվածային անկման պատճառները:
«Երբ մեդուզաները շատ են, դա ջրի խիստ աղտոտման նշան է: Վախենում եմ, որ մոտ ապագայում մեր մոլորակին լավ բան չի սպասվում», «Ինչու՞ նախկինում նման բան չէր լինում», «Ինչպես գիտեք, Ազովի ծովի համար սա նորմալ չէ: Այսպիսի բան երբևէ չի եղել: Հիշեք, որ այս մոլորակը մենք վարձել ենք մեր երեխաներից»,- գրել են անհանգստացած օգտատերերը:
Միևնույն ժամանակ, տեղական լրատվամիջոցները նշում են, որ մեդուզաների անկման պատճառը ջրի բարձր աղիությունն է, գրում է UNIAN-ը: Իսկ բժիշկներն ասում են, որ պետք է խուսափել մեդուզաների հետ շփումից, այդ թվում ալերգիա ունեցողներին, և նշում են, որ դրանք կարող են խայթել նույնիսկ սատկած վիճակում: