Օգոստոսի 6-ին Արցախում մեկնարկելու են Համահայկական խաղերը, որին ներկա են լինելու Սփյուռքից բազմաթիվ ներկայացուցիչներ: Մինչ այդ վարչապետ Նիկոլ Փաշինյանը ելույթ կունենա Ստեփանակերտի Վերածննդի հրապարակում՝ խոսելով համահայկական օրակարգերի հարցերի, Հայաստան-Արցախ-Սփյուռք միասնության հնարավորության և համազգային օրակարգի կարևոր հարցերի լուծման ճանապարհային քարտեզի մասին:
Թեմայի շուրջ «Առաջին լրատվական»-ի հետ զրույցում ԱԺ «Իմ քայլը» խմբակցության պատգամավոր Միքայել Զոլյանը, անդրադառնալով հարցին, թե ինչու է համազգային օրակարգերի հարցերի ճանապարհային քարտեզը ներկայացնելու վայր ընտրվել հենց Արցախը, նկատեց, որ դրանում արտառոց բան չկա: «Մոտակա ամենամեծ միջոցառումը Համահայկական խաղերն են, և բնական է, որ այդ առիթն օգտագործվելու է խնդիրների շուրջ մոտեցումները ներկայացնելու, ինչպես նաև Հայաստանի, Արցախի և Սփյուռքի միասնությունը շեշտելու համար: Սա ուղերձ է՝ ուղղված է թե՛ արտաքին աշխարհին, թե՛ այն մարդկանց, ովքեր մեր հասարակության մեջ փորձում են առաջ տանել այն թեզը, որ Հայաստանի և Արցախի միջև խնդիրներ կան: Հեղափոխությունից հետո առաջին անգամն է, որ Հայաստանի, Սփյուռքի և Արցախի ներկայացուցիչները լինելու են մի վայրում, սա խորհրդանշական իրադարձություն է ամբողջ հայության համար:
Քաղաքական վերլուծաբան Նժդեհ Հովսեփյանը նշեց, որ չի ընդունում այն տեսակետը, թե խզվել է Հայաստանի և Արցախի իշխանությունների միջև կապը: Նրա դիտարկմամբ՝ կարևոր են լինելու ելույթում հնչող ուղերձները: «Հայաստանը չպետք է կապել «հակահայկական որջ» կոչված տեսության հետ. դա գարշելի հակաքարոզչության շրջանակներում է իրականացվում»:
Մանրամասն՝ տեսանյութում:
