Մալայզիայում կազմակերպվել է վերջին տարիների ամենախոշոր քաղաքական հանրահավաքը. փողոց է դուրս եկել առնվազն 10 հազար մարդ, որոնք պահանջում են բարեփոխումներ իրականացնել երկրում: Այս մասին հաղորդում է Associated Press գործակալությունը:
Երկրի մայրաքաղաք Կուալա Լումպուրում փակված են ճանապարհները, չեն գործում երկաթուղային կայարանները: Տեղեկություններ կան, որ ոստիկանությունն օգտագործում է արցունքաբեր գազ և ջրցան մեքենաներ, ձերբակալվել է 514 մարդ: Ընդդիմությունը մեղադրել է իշխանություններին իրավիճակը սրելու մեջ:
Ընդդիմադիրները կոչ են անում երկրի իշխանություններին իրականացնել ընտրական օրենսգրքի բարեփոխումներ, որոնք թույլ կտան 2012 թ. անցկացնել օրինական խորհրդարանական ընտրություններ: Ցուցարարներն իշխանությանը նաև մեղադրում են կոռուպցիայի և ռասայական խտրականության մեջ:
ԱՄՆ Պետքարտուղարությունն արդեն դիմել է Մալայզիայի իշխանություններին՝ կոչ անելով դադարեցնել բռնությունները և հարգել խոսքի և հավաքների ազատությունը:
