Լուրեր
Վստահ եմ՝ վիզաների ազատականացման հարցում Լեհաստանը մեզ կաջակցի․ էդգար Ղազարյան
  • 22:15
  • 2019-07-20
  • Դիտումներ՝ *

«Ինչ վերաբերում է Եվրամիության հետ հարաբերություններին, ճիշտ կլինի այն կապել Լեհաստանով, որովհետև Լեհաստանը շատ ակտիվ դերակատարություն ունի Եվրամիությունում, և տաս տարի առաջ մեկնարկած Արևելյան գործընկերություն ծրագրի նախաձեռնող երկրներից մեկն է։ Հետևաբար, Հայաստանի հետ հարաբերություններում և գործընկերության այլ երկրների հետ հարաբերություններում Լեհաստանն ունի այլ առաքելություն և մշտապես փորձել է իր ակտիվ դերակատարությամբ օգտակար լինել Հայաստանի նախաձեռնություններին։

Այդ իմաստով, կարծում եմ, մենք Լեհաստանի հետ լավ վիճակի մեջ ենք՝ և՛ քաղաքական երկխոսության առումով, և՛ բազմաոլորտ զարգացման առումով՝ պայմանավորված լեհական կողմի շահագրգռվածությամբ»,- «Առաջին լրատվական»-ի հետ զրույցում ասաց Լեհաստանի Հանրապետությունում Հայաստանի նախկին արտակարգ և լիազոր դեսպան Էդգար Ղազարյանը։

«Անշուշտ, իհարկե, Հայաստանի կողմից 2013 թվականին Մաքսային միությանն ու ԵԱՏՄ-ին անդամակցելը եվրոպական մի շարք երկրների կողմից միանշանակ չի ընդունվել, այդ թվում նաև Լեհաստանի կողմից։ Ես դա զգացել եմ նաև իմ առաքելության ընթացքում, բայց կարծում եմ, որ մեզնից շատ երկար ժամանակ չպահանջվեց, որպեսզի ներկայացվեն հայկական կողմի մոտեցումները, և դրանք լրիվ ընդունելի լինեն լեհ գործընկերների համար։

2017 թվականին Հայաստանի կողմից Եվրամիության հետ ստորագրված համաձայնագիրը նոր մակարդակի վրա դրեց այլևս Հայաստան-Եվրամիություն հարաբերությունները, որը, բնականաբար, ողջունելի էր նաև Լեհաստանի համար։ Ի դեպ ասեմ՝ Լեհաստանը առաջին երկրներից մեկն էր, որ վավերացրել է այդ համաձայնագիրը․ գործընթացն ավարտվել է դեռևս 2018 թվականի հուլիսին»,- հավելեց Էդգար Ղազարյանը։

 

 

Մանրամասները՝ տեսանյութում։

  • Դիտումներ՝ *