Հյուրանոցները, հանգստյան գոտիներն ու տուրիստական ընկերությունները նոր համակարգ են առաջարկում՝ «էլեկտրոնային թունազերծում»: Նրանք իրենց հաճախորդներին առաջարկում են հանգստյան օրերի ժամանակ հրաժարվել կապի ժամանակակից միջոցներից: Նրանց, ովքեր պատրաստ են բուժվել ինտերնետ կախվածությունից, սպասում են զեղչեր: Այս մասին գրում է The Wall Street Journal-ը:
Շատ ընկերությունների կարծիքով, որոնք զբաղվում են մարդկանց հարմարավետության ապահովմամբ, սմարթֆոնները, նոութբուքերը և այլ «այֆոնները» ժամանակակից մարդու սթրեսի գլխավոր աղբյուրներն են: Մարդիկ լիովին չեն հանգստանա, եթե ստուգեն իրենց էլեկտրոնային փոստերը, նորացնեն կարգավիճակը Facebook-ում և Twitter-ում,- վստահ են տուրիստական ընկերությունների աշխատակիցները: Այդ իսկ պատճառով շատ հյուրանոցներ իրենց հաճախորդներին առաջարկում են հյուրանոց մտնելուց առաջ իրենց էլեկտրոնային սարքերը հանձնել պահպանման ծառայությանը։ Փոխարենը նրանք կստանան զեղչ հյուրանոցում բնակվելու համար, անվճար կհաճախեն սպա սալոններ կամ էլ կգնան ձիավարության անվճար դասերի:
Հոգեբանները կարծում են, որ համացանցային կախվածությունը կարծես 21-րդ դարի թմրադեղը լինի: Սոցիոլոգիական հարցումների համաձայն, որն անց է կացրել American Express ընկերությունը, ճանապարհորդողների 79% պատրաստվում է կապի մեջ մնալ հանգստի ամբողջ ընթացքում:
Հանգստացողներից ոմանք ասում են, որ դա իրենց անհրաժեշտ է ընտանիքի անդամների և ընկերների հետ անընդհատ կապի մեջ լինելու համար: Նրանց 68%-ը ասում է, որ ամեն օր ստուգելու է իր էլեկտրոնային փոստը, քանի որ իրեն կարող են շատ կարևոր հաղորդագրություն ուղարկել աշխատանքի վայրից: 58%-ը նշում է, որ համացանցային սերֆինգը իրենց համար կդառնա լրացուցիչ զվարճություն հանգստի ժամանակ:
46-ամյա Ջոն Տ. Փիթերսը Բահամյան կղզիներ գնալուց առաջ որոշել է իր հեռախոսը թողել տանը, քանի որ նրա 4-ամյա աղջիկն ամեն անգամ, հորը տեսնելով առանց iPhone-ի, հարցնում է, թե ուր է նա այն դրել:
«Ինչպիսի կախվածություն է իմ մոտ այդ սարքից, որ իմ 4-ամյա աղջկա համար հորը տեսնելը ասոցացվում է բջջային հեռախոսի հետ»,- ասել է Փիթերսը:
Հանրահայտ էլեկտրոնային ծառայության մեկ այլ օգտատեր՝ 29-ամյա Ջուլի Քեփրոուդը, հայտարարել է, որ ինքը օրական 20-50 անգամ ստուգում է էլեկտրոնային փոստը: «Առանց համացանցի՝ ոնց որ առանց ձեռքերի: Սակայն ես շատ ուրախ եմ, որ նոր «էլեկտրոնային թունազերծում» ծառայության հայտնվելուց հետո ես լուրջ պատճառ կունենամ հանգստի ընթացքում մի կողմ դնելու բոլոր գործերը», – ասել է աղջիկը:
Փիթերսն ու Քեփրոուդը միաձայն ասում էին, որ «հակաէլեկտրոնային» արձակուրդից վերադառնալուց հետո իրենց կյանքը շատ արագ ընկել է հունի մեջ, և իրենք նորից սկսել են իրենց հետ քարշ տալ էլեկտրոնային սարքերը: Հնարավոր է, կարծում են հարցման մասնակիցները, իրենց անհրաժեշտ է ավելի քիչ նայել էլեկտրոնային սարքերի էկրաններին ոչ միայն արձակուրդի ընթացքում, այլ նաև տանը, աշխատանքի ժամանակ:
