«Իջևանում երեկ տեղի ունեցածը տարիներ շարունակ մի քանի տասնյակ մարդկանց կողմից մեր կենսատարածքը խժռած, մի քանի սուբյեկտների կողմից հրահրված, կազմակերպված բողոքի ակցիա էր, որի ժամանակ ուժ կիրառվեց։ Մեր տեղեկություններով՝ ակցիան կազմակերպվել ու հրահրվել էր 30-50 անձի կողմից, որոնք գտնվում էին անսթափ վիճակում, ուղղորդվում էին մեկ կետից՝ ավելի մեծ ծավալներով անտառահատումներով զբաղվողների կողմից, որոնց համար կառավարությունը լրջագույն խնդիրներ է ստեղծել՝ արգելելով անտառահատումները»,- «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Նարեկ Մկրտչյանը, ով երեկ եղել է Իջևանում, ականատես եղել կատարվածին։
Նրա խոսքով՝ խնդիրը համակարգային է, և այդ համակարգային խնդիրը լուծելու համար բազմաչափ մոտեցում է պետք։
Քննարկմանը մասնակցող լրագրող Արման Սուլեմանյանը նկատեց, որ, այո, խնդիրը համակարգային է, բայց կա նաև միջանկյալ լուծում. «Նախևառաջ ոլորտը պետք է գույքագրել։ Հիմնական մեր խնդիրն այն է, որ պատկերացում չկա, թե ինչի հետ գործ ունենք, կառավարությունում պատկերացում չկա, թե ինչ ծավալի մասին է խոսքը, ծավալը որտեղից է գեներացվում։ Գույքագրում չի արվել նաև համայնքների առումով։ Կարելի էր բոլոր չգազիֆիկացված համայնքների ղեկավարներին հրահանգ իջեցնել և հետաքրքրվել, թե ձմռան համար որքան վառելիք է հարկավոր, և լուծել մարդկանց վառելիքի խնդիրը։ Թե ինչ ճանապարհով՝ դա արդեն թող իրենք որոշեն»,- նկատեց Սուլեմանյանը։
Նարեկ Մկրտչյանն էլ նշեց, որ խնդրի լուծումներից մեկը կարող է լինել մարդկանց ուղղորդելը, սովորեցնելը գումար աշխատել այլ մեխանիզմներով, օրինակ՝ օգտագործել անտառի ռեսուրսները, փայտից բացի։ «Կա հետազոտություն, որ միայն Տավուշի մարզում միայն անտառի հատապտուղների ռեսուրսը 300 միլիոն դոլարից անցնում է։ Կարելի է անտառը դիտարկել որպես էկոտուրիզմի զարգացման հնարավորություն»,- նկատեց պատգամավորը։
Առավել մանրամասն՝ տեսանյությում: