Լուրեր
Գործընթացը նախանշված էր և իրականություն է դառնալու․ վեթինգ, թե բարեվարքություն

Առ այսօր Վենետիկի հանձնաժողովի անդամներ են մերժված իշխանության կողմից նշանակված ներկայացուցիչները՝ Գագիկ Հարությունյանը և Վարդան Պողոսյանը: Եվ Վենետիկի հանձնաժողովի հերթական նիստի արձանագրությունը, որը սահմանափակ հասանելիությամբ փաստաթուղթ է, տիրաժավորվել է նախկինում իշխանություն, ներկայում որպես ընդդիմություն հանդես եկող որոշակի շրջանակների կողմից և շահարկվել:

Վենետիկի հանձնաժողովն այսօր հայտարարություն է տարածել, որում բեղմնավոր է գնահատում Հայաստանի իշխանությունների հետ աշխատանքը և նշում, որ դատական բարեփոխումների առնչությամբ կարծիք կներկայացնի, երբ պատրաստ կլինեն ՀՀ դատական օրենսգրքի փոփոխությունները:

Թեմայի շուրջ «Առաջին լրատվական»-ի հետ զրույցում Արդարադատության նախարար Ռուստամ Բադասյանը նշեց. «Իրականում երևույթը շատ ավելի նվազ է, քան դրա շուրջ ստեղծված աղմուկը և որոշակի առումով արհեստական է»: Նախարարի դիտարկմամբ՝ Վենետիկի հանձնաժողովի հատարարության հիմնական ուղերձն այն է, որ ՀՀ-ի հետ համագործակցությունն արդյունավետ է, և կողմերը պատրաստ են միմյանց հետ աշխատել: «Մենք նույնպես կարևոր ենք համարում և արդյունավետ ենք գնահատում մեր համագործակցությունը… Հայաստանի իշխանություններն ամբողջությամբ ընկալելի են մեր միջազգային ընկերների համար»: Նախարարի խոսքով՝ փակ ռեժիմով նիստի արձանագրությունները շահարկվել են:

Անդրադառնալով դիտարկմանը, որ Վենետիկի հանձնաժողովը մտահոգություն է արտահայտել վեթինգ եզրույթի հետ կապված, և մեր իշխանության ներկայացուցիչները նույնպես խոսում են այն մասին, որ միգուցե անունը վեթինգ չլինի, բայց գործընթացը նույնն է լինելու, նախարարը նշեց. «Իրավաբանության մեջ որևէ տերմին կարևոր չէ, կարևորը բովանդակությունն է: Վարչապետի հայտարարության մեջ նշված է «այսպես կոչված վեթինգ է իրականացվելու», և պարզաբանվում է՝ «գույքային դրության ստուգում, բարեվարքության և կապերի ստուգում»: Մենք հիմա նախատեսում ենք այնպիսի մեխանիզմ, որը կարգապահական հիմքերն է սահմանելու… Այսինքն՝ հակասություն չկա հասարակությանը տրված բովանդակային հաղորդագրության և մեր գործունեության միջև:

Արդարադատության նախարարությունը հայտարարություն է տարածել, որում նշված է, որ Վենետիկի հանձնաժողովի եզրակացությունը «շահարկումների» տեղիք է տվել, իսկ Հայաստանի իշխանության ու հանձնաժողովի մոտեցումները ամենևին հակասական կամ հակադիր չեն, այդ թվում՝ դատավորների վեթինգի վերաբերյալ: Սակայն արդարադատության նախարարության հայտարարության մեջ ամենահետաքրքիրը թերևս այն էր, որ նախարարությունն ազդարարել էր առաջիկայում այդ թեմայով վարչապետ Նիկոլ Փաշինյանի հայտարարության մասին: Նախարարն անդրադարձավ նաև այս դիտարկմանը և հարցին, թե արդյոք վարչապետը որոշակի դիրքորոշում է արտահայտելու Վենետիկի հանձնաժողովի վերաբերյալ:

Մանրամասն՝ տեսանյութում:

  • Դիտումներ՝ *