ԱՄՆ Սպիտակ տունը փորձարկում է LG և Samsung արտադրության սմարթֆոններ: Այս մասին հաղորդում է The Wall Street Journal-ը՝ վկայակոչելով իր աղբյուրին: Տեղեկատվության համաձայն՝ փորձարկմամբ զբաղվում են ներքին տեխնոլոգիական ստորաբաժանման աշխատակիցները և Սպիտակ տան կապի կառավարման ներկայացուցիչները:
Աղբյուրի խոսքով՝ թեստերը գտնվում են վաղ փուլում: Թե արդյոք ԱՄՆ նախագահ Բարաք Օբաման կհրաժարվի՞ իր մոդիֆիկացված BlackBerry-ից՝ առայժմ չի հաղորդվում:
ԱՄՆ պաշտպանության նախարարության մամլո քարտուղարը միայն հաստատել է, որ Սպիտակ տան կապի վարչությունը ուսումնասիրում և օգտագործում է տարբեր բջջային սարքեր: Նա հրաժարվել է մեկնաբանել սարքերի մասին տեղեկատվությունը, որոնք Սպիտակ տանը գտնվում են փորձարկման մեջ կամ օգտագործվում են:
Samsung-ի ներկայացուցիչը ևս հրաժարվել է մեկնաբանություններից, իսկ LG-ի մամլո քարտուղարը հայտարարել է, որ ընկերությունը ոչինչ չգիտի այդ թեստերի մասին:
