Ազգային ժողովում խորհրդարանական լսումների մակարդակով քննարկվում է Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին ՀՀ օրենքում լրացումներ կատարելու մասին օրենքի նախագիծը, որով նախատեսվում է Սևանա լճից ջրի բացթողնման տարեկան չափաքանակ սահմանել 240 մլն խմ-ն (70 մլն խմ ավելի)՝ կախված Սևանա լճից սնվող ոռոգման համակարգերի ջրաղբյուրների՝ Հրազդան գետի, Ապարանի, Ազատի և Մարմարիկի ջրամբարներ, ջրատվության աստիճանից:
Սևանա լճից ջրառի ծավալների ավելացումը մտահոգել է բնապահպաններին և այլ շահագրգիռ անձանց՝ հակառակ բնապահպանության նախարար Արամ Հարությունյանի հավաստիացումների, թե դա բացասական հետևանքների չի բերի:
ԱԺ ԲՀԿ-ական պատգամավոր Լյովա Խաչատրյանը «Առաջին լրատվական»-ի հետ զրույցում նշեց, որ անհրաժեշտ է ստեղծված վիճակին Ճիշտ գնահատական տալ, նաև՝ հետևանքները գնահատել: «Մենք 2008 թվականին վերցրինք ջուր, երրորդ անգամ ենք ջուր վերցնում, ոչ մի անգամ մեզ չներկայացրին ծրագիր, ինչը կբացառի հետագայում Սևանից ջուր չվերցնելու ապագան: Ես մի օրինակ եմ բերում՝ Արագածի վրա մեկ միլիարդ խմ ջուր ունենք, եթե դա պաշարենք, Սևանի ջուրը մեզ պետք չի լինի, բերեք՝ ջրամբարները սարքենք, պաշարենք էս տարիների ընթացքում»,- ասաց նա՝ հավելելով, որ աշխատանք է պետք կատարել, ծրագիր է պետք մշակել, և չգիտի՝ ինչու այդ ամենը չեն արել:
Նա նշեց, որ նույնիսկ չի հասկանում, երբ ասում են՝ եթե բացասական հաշվեկշիռ ստացվի, ջուր չեն թողնելու: «Ինչ ա նշանակում՝ հինգ անգամ թողնելու են, վեցերորդ անգամ չեն թողնելու, գնալու ա էդ սաղ այգիները վերանան. մի անգամ էդ բանն արեցինք: Ո՞նց կարող ա չթողնես, ջուրը նրա համար է, որ ծառայի ժողովրդին, ժողովուրդն ու պետությունն էլ նրա համար են, որ վերադարձնեն ջուրը բնությանը. էս ա խնդիրը»,- ասաց նա:
Պատգամավորի համոզմամբ՝ պիտի պահպանվի փոխադարձ կապը, այսինքն՝ ինչպես անեն, որ ջուրը վերցնելուց հետո վերադարձնեն, իսկ վերադարձնելու ձևը ջրամբարների կառուցումն է, ռացիոնալ ոռոգման համակարգի՝ տնտեսող համակարգի ներդրումը և այլն, այսինքն՝ պիտի մշակվի ծրագիր և իրականացվի:
Հարցին՝ ստեղծված խնդիրների լուծման ձևը կառավարության հրաժարակա՞նն է, Խաչատրյանը պատասխանեց. «Եթե էս կառավարության գլուխը էդքան չի հասկանում, ուրեմն մյուսը կգա, կհասկանա երևի»:
Բնապահպան Լևոն Գալստյանն «Առաջին լրատվական»-ի հետ զրույցում կարևորեց ջրի մակարդակի անընդհատ բարձրացումը, նրա կարծիքով՝ հակառակ պարագայում ջրի կորուստ կլինի, և Սևանի ջրի որակը կսկսի վատանալ: Գալստյանի խոսքով՝ չկա գիտականորեն հիմնավորված տեսակետ, մոդելավորված սխեմա՝ ինչ հետևանքների կբերի այդ ամենը, սակայն կան հատվածներ, որտեղ մինչև հինգ անգամ պակասել է ջրի ելքը:
«Ո՞վ է այդ ամենը թույլ տվել, ո՞վ է այդ ամենի պատասխանատուն. այն մարդիկ, ովքեր խոսում էին՝ ջրային տնտեսության պետական կոմիտեի նախագահը, նույն բնապահպանության նախարարը. երբ 7 տարի տալիս էին թույլտվությունները, ոչ մեկը չէր վերահսկում, ո՞վ է պատասխան տալու: Մինչև պատասխանատվության մեխանիզմը չաշխատի, ոչ մի դրական բան չի լինի: Ուզում ենք հինգ տարով խնդիրը լուծել Սևանի հաշվին, հինգ տարի հետո Սևանի հետ ինչ կլինի՝ ոչ մեկը չգիտի»,- ասաց նա:
Գալստյանը նկատեց՝ նրանք, ովքեր պատասխանատու են, նորմալ իրավական երկրում գոնե պետք է հրաժարական տային, առնվազն հինգ-վեց պաշտոնյա, այդ թվում նաև՝ վարչապետը, իսկ առավելագույնը՝ նրանք պիտի քրեական պատասխանատվության ենթարկվեին:
Մանրամասները՝ տեսանյութում:
