Ավելի վաղ ՀՅԴ ներկայացուցիչները հանդիպել են «Բարգավաճ Հայաստան» կուսակցության և «Ժառանգության» անդամների հետ։ ՀՅԴ Հայաստանի Գերագույն մարմնի այս նախաձեռնության նպատակն է խորհրդարանական և արտախորհրդարանական քաղաքական առողջ ուժերի հետ քննարկել երկրում տիրող քաղաքական իրավիճակը և մի շարք հարցերի ուղղությամբ ճշգրտել մոտեցումներն ու համագործակցության հնարավոր ուղիները։
Քաղաքագետ Գագիկ Համբարյանի կարծիքով՝ ՀՅԴ-ն դիրքավորվել է ընդդիմադիր շարքերում, ուստի նման քննարկումներն ու հանդիպումները միանգամայն նորմալ են: «Բայց ասել, որ կա կոնկրետ ծրագիր, որը կարող է մոտ ժամանակաշրջանում իրագործվել՝ չեմ կարծում։ Իսկ այն, որ քաղաքական ուժերը նախապատրաստվում են, այսպես կոչված, «թեժ աշնանը», դա փաստ է, և ամեն քաղաքական ուժ՝ լինի խորհրդարանում, թե խորհրդարանից դուրս, իր ձևաչափով կհամագործակցի մյուսների հետ։ Իրենք շատ լավ հասկանում են մեկ բան՝ միայնակ որևէ արդյունքի չեն կարող հասնել գործող իշխանությունների դեմ պայքարում»,- «Առաջին լրատվական»-ի հետ զրույցում ասաց նա։
Ըստ Համբարյանի՝ հնարավոր է մի քանի ուժերի հետ միավորում լինի. «Վերջնանպատակը պայքարն է գործող իշխանությունների դեմ, և այդ միավորումը կարևոր է նրանց համար, ու սա է պատճառը, որ Դաշնակցությունը բանակցում է այլ քաղաքական ուժերի հետ»։
Քաղաքագետը նաև չի բացառում, որ Դաշնակցությունը կարող է տեղավորվել Քոչարյանի նշած ընդդիմադիր բևեռի մեջ. «Ինչու ոչ, ժամանակին Դաշնակցությունը Ռոբերտ Քոչարյանի հետ սերտ համագործակցել է, և ես չեմ բացառում, որ վաղը-մյուս օրը ՀՅԴ-ն փորձի դառնալ այդ բևեռներից մեկը ու վերսկսի իր համագործակցությունը»։
Մեր զրուցակիցը միևնույն ժամանակ շեշտեց՝ հետհեղափոխական շրջանում քաղաքական ուժերի վարկանիշի կտրուկ անկում է տեղի ունենում, և դա օրինաչափ է բոլոր երկրների համար. «Այն, որ գործող իշխանությունների վարկանիշը 80-90 տոկոսից գահավիժել է մինչև 50 տոկոս՝ փաստ է, և ինչպես ասում են՝ սուրբ տեղը դատարկ չի մնում։ Գործող իշխանություններին համակրող զանգվածի մի մասը մեխանիկորեն սկսում է այլ ուժի համակրել։ Այստեղ պատահական չէ, որ ամերիկյան հանրապետական միջազգային ինստիտուտի վերջին հարցումների տվյալներով՝ ՀՅԴ-ն մոտավորապես 4-5 տոկոս ձայն ունի, էլ չեմ ասում՝ ՀՀԿ-ի մասին, որը 5,1 տոկոս ձայն էր ստացել ըստ այդ հարցումների։ Գործող իշխանությունների բացթողումները մեխանիկորեն դրական անդրադարձ են ունենում ընդդիմադիրների վրա, և այս պահին հայտարարել, որ Դաշնակցությունը նախկինում եղել է նախկինների կողմնակիցը և ասոցացվում է նրանց հետ՝ մի փոքր սխալ կլինի»։
Համբարյանի դիտարկմամբ՝ Հայաստանի քաղաքական դաշտում առկա գրեթե բոլոր քաղաքական ուժերը համագործակցել են նախորդ իշխանությունների հետ տարբեր ֆորմատներով՝ կոալիցիա կամ շատ սերտ համագործակցություն, դա չպետք է ուրախացնի գործող իշխանություններին այն իմաստով, որ հասարակությունը նրանցից երես կթեքի։ Ժողովրդական խոսք կա՝ շատ մի սիրիր, ատել կա, և հակառակը։ Հիմա քաղաքականության մեջ ամեն տեսակի համագործակցություն հնարավոր է՝ սիրել կամ չսիրելու հետ ասոցիացիաները այլևս տեղ չունեն։ Ինչքան շատ սխալներ գործեն գործող իշխանությունները, հեռանան հասարակությունից, մոռանան իրենց խոստումները՝ այնքան ավելի մեծ շանսեր են ստանում նախկինների ներկայացուցիչները, այդ թվում՝ նաև ՀՅԴ-ն, որը լծված է գործող իշխանություններին քննադատելու գործին և, ինչպես իրենք են ասում, հասարակության աչքերը բացելուն՝ գործող իշխանությունների ստերի հետ կապված»։
