Լուրեր
Էս ո՞ւր ենք գնում. Եկեք խորհրդարանն էլ ցրենք, լինի միայն վարչապետը. Էդմոն Մարուքյանը հեգնեց
  • 10:57
  • 2019-07-10
  • Դիտումներ՝ *

Այսօր՝ հուլիսի 10-ին, Ազգային ժողովում հրավիրվել է արտահերթ նիստ:

ՄԻԵԴ-ում ՀՀ ներկայացուցչի հարցը քննարկելիս «Լուսավոր Հայաստան» խմբակցության ղեկավար Էդմոն Մարուքյանը հայտարարեց. «Այս օրենքի ընդունումը լավ օրինակ է՝ ցույց տալու, որ մենք գտնվում ենք հին խայտառակ մտածողության մեջ»:

Մարուքյանը պաշտոնապես հայտարարեց. «Ոչ մի հոդաբաշխ հիմնավորում չի բերվել, թե ինչու ենք այս օրենքը ընդունում, ինչու է առանձնանում ՄԻԵԴ-ում ՀՀ ներկայացուցիչը»:

Էդմոն Մարուքյանն առաջարկեց ԴԱՀԿ-ն, քրեակատարողական ծառայությունը հանել արդարադատության նախարարության կազմից և մտցնել վարչապետի աշխատակազմ. «Մեկ է՝ նրանց նշանակում է վարչապետը»: «Լուսավոր Հայաստան» խմբակցության ղեկավարը շարունակեց հեգնել՝ ասելով, որ առաջարկում է լուծարել նաև բոլոր նախարարությունները. «Լինեն բաժնի պետեր և խորհրդարան ընդհանրապես չգան: Լինի խորհրդարան ու վարչապետ, կամ էլ խորհրդարանն էլ ցրենք, լինի միայն վարչապետ»:

«Դատարաններն էլ եկեք լուծարենք, վարչապետի աշխատակազմում ստեղծենք արդարադատության բաժին, մեկն էլ Սողոմոն թագավորի պես նստի ու մարդկանց չագուճով ասի՝ դու ճիշտ ես, դու սխալ: Հա մոռացա՝ ՍԴ-ն էլ տարեք, դա էլ արդեն գիտեք՝ ով կլինի ղեկավարը»,- ասաց նա և հավելեց. «Էս ո՞ւր ենք գնում, մեկը չկարողացավ հիմնավորել, թե ինչու ենք առանձնացնում»:

 

Մանրամասները՝ տեսանյութում:

  • Դիտումներ՝ *