Եվրահանձնաժողովի նախագահ Ժոզե Մանուել Բառոզուն առաջնահերթ է համարում կայուն և բարգավաճող Ուկրաինային աջակցելը: RIA Novosti-ի փոխանցմամբ՝ այս մասին նա ասել է լրագրողներին:
«Մենք Ուկրաինայում տիրող իրավիճակը կքննարկենք ԵՄ գագաթնաժողովին: ԵՄ-ն չի ճանաչում Ղրիմի միացումը: Մենք կշարունակենք ներդնել բոլոր ջանքերը ներկայիս ճգնաժամի լուծման համար, խաղաղ լուծման, որը ձեռք կբերվի բանակցությունների միջոցով, որը պետք է հարգի Ուկրաինայի ինքնիշխանությունը: Ես հույս ունեմ, ավելին՝ վստահ եմ, որ Եվրոպայի խորհուրդը համաձայնության կգա ստեղծված իրավիճակին ընդհանուր եվրոպական պատասխան տալու հարցում: Ես անձամբ կարծում եմ, որ ներկայում ամենահրատապը կայուն, կենսունակ, ժողովրդավար և բարգավաճող Ուկրաինայի աջակցման համար ջանքեր ներդնելն է: Դա լավագույն պատասխանն է, որ մենք կարող ենք տալ: Միևնույն ժամանակ անդամ երկրները պետք է դիտարկեն, թե որքան հեռուն են պատրաստ գնալ՝ հստակ ցույց տալու, որ վարքը, որի ականատեսը եղանք վերջերս Եվրոպայում, անընդունելի է և պետք է որոշակի հետևությունների հանգեցնի»,- ասել է նա:
ԵՄ գագաթնաժողովը կկայանա Բրյուսելում այսօր և վաղը:
