Սլովակիայում տեղի ունեցող ԵԱՀԿ նախարարական համաժողովի շրջանակում Հայաստանի արտաքին գործերի նախարար Զոհրաբ Մնացականյանը հանդիպել է ՌԴ արտգործնախարար Սերգեյ Լավրովի հետ: Հանդիպման ընթացքում քննարկվել են թե՛ երկկողմ, թե՛ միջազգային, ռեգիոնալ օրակարգի հարցեր, նաև արցախյան խնդիրը: Օրակարգի այդ դիապազոնում կոնկրետ հարցերն ու խնդիրները իսկապես շատ են, այդ թվում, թերևս, ռուս-վրացական հարաբերության լարվածության հարցը: Սակայն Հայաստանի և Ռուսաստանի արտգործնախարարների հանդիպման հանգամանքը, թերևս, հետաքրքրություն է առաջացնում օրակարգի հնարավոր մեկ այլ հարցի առնչությամբ կամ, ավելի շուտ՝ այդ հարցի օրակարգում հայտնվելու հավանականության առնչությամբ:
Խոսքը Հայաստանի ներքաղաքական կյանքում վերջին շաբաթներին ՌԴ դեսպանի դրսևորած աշխուժության, հանդիպումների և դրանց նկատմամբ պաշտոնական Երևանի արձագանքի մասին է: Արձագանք, որ երկրորդ նախագահ Ռոբերտ Քոչարյանի հետ դեսպանի հանդիպումից հետո ընդհանրապես ունեցավ աննախադեպ դրսևորում, և ՌԴ դեսպանին հրավիրեցին Հայաստանի ԱԳՆ «ներքին գործերին չմիջամտելու համատեքստում զրույցի համար»: Եվ, եթե սրան գումարենք նաև դեռևս նախորդ տարի Ռոբերտ Քոչարյանի մեղադրանքի և կալանման գործով հենց իր՝ Լավրովի հայտարարությունը, ապա դեսպանի աշխուժության համատեքստում հայ-ռուսական նախարարական մակարդակի հանդիպմանը այդ թեմայի քննարկվածության հնարավորությունը կամ հավանականությունը իսկապես դառնում է հետաքրքիր:
Հայտնի է, որ ՌԴ դեսպանը Ռոբերտ Քոչարյանի հետ հանդիպումից հետո հանդիպում է ունեցել նաև Սահմանադրական դատարանի նախագահ Հրայր Թովմասյանի, իսկ ավելի ուշ նաև ՀՅԴ և ՀՀԿ ներկայացուցիչների կամ, այսպես ասած, Արցախ-Հայաստան ռազմա-քաղաքական դաշինք խորագրի ներքո կազմակերպված համաժողովի կազմակերպիչների հետ՝ նկատի ունենալով հանգամանքը, որ համաժողովն իր, այսպես ասած, կազմով և քննարկումների բովանդակությամբ գործնականում գտնվում էր Ռոբերտ Քոչարյանի քաղաքական գծագրերին ներդաշնակ տիրույթում:
Այս վերջին հանգամանքն էլ լրացուցիչ հետաքրքրություն է ստանում այն համատեքստում, որ ՌԴ արտգործնախարարի հետ հանդիպման Հայաստանի արտգործնախարարը փաստորեն գալիս է Արցախից, որտեղ հանդիպել էր նախագահ Բակո Սահակյանի, արտգործնախարար Մայիլյանի և ԱԺ նախագահ Ղուլյանի հետ, և ստորագրվել էր արտգործնախարարությունների խորհրդակցությունների պլանը: Իսկ բանն այն է, որ այս զարգացումները ըստ էության շոշափում են նաև Արցախի նախագահի ընտրության հարցը, որի շրջանակում էլ առկա թևածող տրամադրություններից է, այսպես ասած, «ռուսական մանդատի» միտքը, որն արտահայտել է ոչ միայն նախկին պաշտպանության նախարար Սամվել Բաբայանը, այլ նաև շաբաթներ առաջ Արցախ այցելած ռուսաստանյան, այսպես ասած, հայտնի անգաժավորված փորձագետներ Տարասովն ու Կոլերովը: Հարցերի այդ շրջանակը շոշափվե՞լ է Մնացականյան-Լավրով հանդիպմանը, թե՞ հայկական կողմն ամեն ինչ ասել էր ՌԴ դեսպանին, և Լավրովի հետ «ներքին գործերը» քննարկելու անհրաժեշտություն Երևանը չի տեսել:
Թեև դեսպանը ՀՅԴ-ՀՀԿ կազմակերպիչներին ու Թովմասյանին հանդիպել էր ԱԳՆ-ում հայտնի զրույցից հետո:
