Հայաստանի պետական ֆիլհարմոնիկ նվագախումբը գեղարվեստական ղեկավար և գլխավոր դիրիժոր Էդուարդ Թոփչյանի ղեկավարությամբ մարտի 21-ին կներկայացնի այս համերգաշրջանի ամենակարևոր ծրագրերից մեկը` Գուստավ Մալերի «Երգ երկրի մասին» Սիմֆոնիկ կանտատի հայաստանյան պրեմիերան, Արամ Խաչատրյան համերգասրահում:
Վեց երգերից բաղկացած ստեղծագործությունը՝ գրված նվագախմբի և երկու վոկալ կատարողի համար, առանձնանում է չինական յոթ քառյակների վրա հիմնված բանաստեղծական տեքստով, որին հայ ունկնդիրն առաջին անգամ հնարավորություն կունենա ծանոթանալու նաև հայերեն լեզվով. Ֆիլհարմոնիկի նախաձեռնությամբ բանաստեղծական բոլոր վեց մասերը թարգմանվել են Հակոբ Մովսեսի կողմից հատուկ այս համերգի առթիվ և տպագրված կներկայացվեն ներկա ունկնդիրներին: Մեներգիչները կանտատը կներկայացնեն գերմաներենով:
Էդուարդ Թոփչյանի ղեկավարությամբ համերգին որպես մենակատարներ հրավիրված են հանդես գալու Զանդրա Մքմաստերը (մեձո սոպրանո, Հյուսիսային Իռլանդիա) և Լիպարիտ Ավետիսյանը (տենոր, Հայաստան):
Անվանի մեձո սոպրանո Զանդրա Մքմաստերը երաժշտական կրթությունն ստացել է Մեծ Բրիտանիայում` Լոնդոնի Trinity College երաժշտական բարձրագույն դպրոցում և Լոնդոնի օպերային կենտրոնում: Համերգներով հանդես է եկել Բեռլինի սիմֆոնիկ, Լիոնի ազգային, Նորվեգիայի ռադիո սիմֆոնիկ և միջազգային կարևորություն ունեցող բազմաթիվ այլ նվագախմբերի հետ Եվրոպայում և Միացյալ նահանգներում:
Տենոր Լիպարիտ Ավետիսյանը հայ օպերային արվեստի ամենահեռանկարային երգիչներից է. սովորել է Երևանի և Մոսկվայի կոնսերվատորիաներում: Հանդես է եկել «Վիվա Վերդի» փառատոնում, Լոնդոնի «Հայաստանի պատանի տաղանդներ» համերգաշարում, Սանկտ Պետերբուրգի «Սպիտակ գիշերների աստղեր» 21-րդ միջազգային փառատոնում: Մի շարք միջազգային մրցույթների դափնեկիր է. համերգներով հանդես է եկել Ռուսաստանում, Ուկրաինայում, Չինաստանում, Բելգիայում, Անգլիայում: Երևանի օպերային թատրոնի մեներգիչ է: Լիպարիտ Ավետիսյանը երջանկահիշատակ պրոֆեսոր Ռաֆայել Հակոբյանցի սանն է: Մարտի 21-ի իր ելույթը Լիպարիտը նվիրում է վերջինիս հիշատակին:
