Երկու ճանապարհատրանսպորտային պատահար՝ ընդամենը մի քանի օրում. Երևան-Երասխ ճանապարհին միմյանց բախվեցին երկու մարդատար ավտոմեքենա և Արարատ-Երասխ երթուղին սպասարկող «Գազելը», և բոլոր մեքենաները վերածվեցին մոխրակույտի: Այս պատահարին հաջորդեց լուրը, որ Երևան-Վրաստան ճանապարհին վարորդը քնել է և բախվել բետոնե պատնեշին: Թեմայի շուրջ զրուցելու համար «Առաջին լրատվական»-ը հյուրընկալել է «Վարորդի ընկեր» ՀԿ համահիմնադիր Սերգեյ Ղահրամանյանին և ԱԺ պատգամավոր Նիկոլայ Բաղդասարյանին:
Այս առնչությամբ պատգամավոր Նիկոլ Բաղդասարյանը արձանագրեց. «Նախորդ ավտորիտար համակարգը թույլ էր տալիս կաշառքի միջոցով ստանալ վարորդական իրավունքներ, և այդ ծառայությունից շատերն են օգտվել: Եվ ունենք մի իրավիճակ, երբ տրանսպորտային միջոց վարող անձինք չունեն ավտոմեքենա վարելու բավարար գիտելիքներ և հմտություններ, ինչն էլ դառնում է նման ավտովթարների պատճառ»:
Նրա խոսքով՝ ավտովթարների մյուս պատճառն այն է, որ տրանսպորտային միջոցները հաճախ անսարք վիճակում են. «Մենք ունենք շատ հնացած ավտոմեքենաների պարկ: Բացի այդ, մեր պետությունում բացակայում են տրանսպորտային միջոցների անվտանգության մեխանիզմները»:
Նիկոլայ Բաղդասարյանը հավելեց, որ կան խնդիրներ՝ նաև կապված ճանապարհային նշանների հետ. «Շատ հաճախ այդ նշանների բացակայությունը հանգեցնում է ավտովթարի: Այս շարքը կարելի է շարունակել, և այս խնդիրները համակարգային լուծման կարիք ունեն»:
Սերգեյ Ղահրամանյանի կարծիքով՝ ցածր է նաև վարորդների իրավագիտակցության մակարդակը. «Կան չգրված, բայց հայտնի պարզունակ օրենքներ, որոնց հաճախ չեն հետևում վարորդները»:
Մեր զրուցակիցը խնդիր է տեսնում նաև վերահսկողության մեխանիզմների մեջ. «Մարդիկ տեսնում են, որ անվերահսկելի և անպատժելիության մթնոլորտ է եղել, որին նաև նպաստեցին համաներումը, ոստիկանության մեղմ վերաբերմունքը, ինչը այլ կերպ ընդունվեց իրավախախտ վարորդների կողմից. այս ամենի հետևանքով ավելացավ ճանապարհատրանսպորտային պատահարների թիվը»:
Անդրադառնալով Վրաստանի դեպքին՝ Սերգեյ Ղահրամանյանը նկատեց՝ դա իրավագիտակցության հարց է. «Վարորդը բեռնախցիկում մարդ է տեղափոխել և անպատիժ հասել է մինչև Վրաստան, այսինքն՝ այդպես Հայաստանով անցել է: Անվերահսկելիության պատճառներից մեկը ռեսուրսների անբավարարության խնդիրն է»:
Հարցազրույցն ամբողջությամբ՝ տեսանյութում:
