Իր ռուսական հայացքներով, ռուսամետությամբ հայտնի Գյումրիի նախկին քաղաքապետ Վարդան Ղուկասյանը շատ ճիշտ է համարում Ղրիմի և Ուկրաինայի հարցում Պուտինի դիրքորոշումը: Իսկ Ղրիմը Ռուսաստանին միացնելու որոշումը համարում է «փայլուն»:
«Շատ ճիշտ արեց Պուտինը, ես իրա ցավը տանեմ, էդպես է պետք, որովհետև դա իրենց պապական հողն է: Ու հետո՝ ամեն մարդ իր կողմնորոշումն ունի. եթե ժողովրդի 90 տոկոսն ասում է, որ ուզում է Ռուսաստանին միանալ, ուրեմն պետք է միանա: Շատ ճիշտ արեց Պուտինը: Ամբողջ աշխարհի, Միացյալ ազգերի կազմակերպության օրենքների մեջ ամրագրված է, որ յուրաքանչյուր տարածքում, ովքեր որտեղ բնակվում են, հանրաքվե են անում, և ոչ ոք իրավունք չունի իրենց կամքին բռնանալու: Փառք Աստծո, էդպես էլ եղավ»,- ասաց Ղուկասյանը:
Մեր դիտարկմանը՝ Ղրիմի հանրաքվեն անցկացվել է ռուսական զորքի ճնշման ներքո, ինչպե՞ս կարելի է ճանաչել այդ հանրաքվեի արդյունքները, Ղուկասյանը արձաքանքեց. «Էդպիսի ոչ մի ճնշում էլ չի եղել, էդպիսի բան չկա, ու ոչ մեկս չի տեսել: Ես գիտեմ, որ Ղրիմում շատ հայեր են ապրում, էնտեղից մենք ինֆորմացիա ունենք, որ իրենք բոլորը՝ 90 տոկոսն իսկապես ուզում են միանալ Ռուսաստանին:
Ինչու չպետք է միանան Ռուսաստանին, երբ երկու հոգի հարբած վիճակում այդ տարածքը, իրենց կնոջ կամ մոր փոխարեն, բռնել տվել էին Ուկրաինային: Ուկրաինան էլ նույն Ռուսաստանն է՝ կիևսկայա ռուս, ես զարմանում եմ, որ հեռուստատեսությամբ էդ բառերը չեն ասում: Վերջապես՝ նրանք հարազատ եղբայրներ են, և պետք չի նրանց մեջ կռիվ քցել. էդքան բան»,- հավելեց Ղուկասյանը:
«Շատ ճիշտ է անում, ողջունում եմ նմանատիպ ղեկավարին՝ ինչպիսին Պուտինն է, ազգասեր, հայրենիք սիրող, և ես տեսա, որ այսօր իր ազգի համար լաց էր լինում: Թեև ասում են՝ բռնապետ է, բայց առանց դրա չի լինի: Դեմոկրատիայի տակ ավելի շատ բռնապետություն կա, քան թե Պուտինի գործելաոճում»:
Գյումրու նախկին քաղաքապետը նաև կարծիք հայտնեց, որ Ղրիմի հարցի այսօրինակ կարգավորումը «կաջակցի Ղարաբաղի հարցի լուծմանը, կնպաստի, որ Ղարաբաղի հարցն էլ լուծվի, և ամբողջ աշխարհը կճանաչի Ղարաբաղը»:
Հակառակ իր պրոռուսական դիրքորոշման՝ Ղուկասյանը դեմ է, որ Ղարաբաղը միանա Ռուսաստանին, ինչպես օրերս առաջարկել էր Վլադիմիր Ժիրինովսկին: «Ինչո՞ւ պետք է Ղարաբաղը միանա Ռուսաստանին: Ժիրինովսկին իր կարծիքը ունի, բայց մենք էնտեղ արյուն ենք թափել, դա մեր պապական հողն է, դա հայկական հող է: Դա հայոց տարածք է, և պետք է այնտեղ հայերեն խոսեն»,- եզրափակեց Վարդան Ղուկասյանը:
