Հարավային Կովկասի ռազմաքաղաքական իրավիճակը կայուն է, սակայն մտահոգիչ՝ չկարգավորված հակամարտությունների պատճառով. «ՆԱՏՕ և Հարավային Կովկաս՝ ռազմավարական մոտեցումներ տարածաշրջանի անվտանգությանը» միջազգային կոնֆերանսին իր բացման խոսքում ասաց ՀՀ Ազգային անվտանգության խորհրդի քարտուղար Արթուր Բաղդասարյանը:
Նա նշեց, որ վեց տարի է՝ գործում է ՀՀ-ՆԱՏՕ համագործակցությունը համակարգող միջգերատեսչական հանձնաժողովը, որը ղեկավարում է անձամբ, իսկ հանձնաժողովի կազմում ընդգրկված են պետական կառավարման այն մարմինները , որոնց գործունեությունն այս կամ այն կերպ առնչվում է ՀՀ-ՆԱՏՕ համագործակցությանը, ՀՀ-ՆԱՏՕ միջգերատեսչական հանձնաժողովի նախանշված բոլոր միջոցառումներն իրականացվել են:
Անդրադառնալով տարածաշրջանին՝ ՀՀ ԱԱԽ քարտուղար Արթուր Բաղդասարյանն ասաց, որ Հարավային Կովկասում տարածաշրջանային ռազմաքաղաքական իրավիճակը կայուն է, սակայն մտահոգիչ՝ չկարգավորված հակամարտությունների պատճառով, քանի որ դրանք բացասական հետևանքներ են ձևավորում: Նրա գնահատմամբ՝ հակամարտությունների հնարավոր ակտիվացումը լուրջ սպառնալիք է տարածաշրջանի կայունության համար:
«ՀՀ-ի համար կարևոր է կայուն տարածաշրջանը, տարածաշրջանն այսօր բարդ իրավիճակում է, որտեղ ՀՀ-ն հանդես է գալիս տարածաշրջանում առկա խնդիրները փոխընդունելի փոխզիջումների միջոցով կարգավորելու օգտին: Դա ավելի ընդունելի է, քան անխոհեմ առճակատումը, որը ապագային միտված հարաբերություն է: Մենք մեր հարևանների հետ պետք է կարողանանք հաստատել ապագային միտված հարաբերություններ»,- ասաց ՀՀ ԱԱԽ քարտուղարը:
Խոսելով հայ-թուրքական հարաբերությունների մասին՝ նա նշեց, որ ՀՀ-Թուրքիա հարաբերությունների կարգավորումը լուրջ հնարավորություն կտա ոչ միայն մեր տարածաշրջանին բերել խաղաղություն, այլև միասին՝ բարեփոխումների միջոցով, տարածաշրջանը զարգացնել, սակայն թուրքական կողմից գործնական քայլեր չեն երևում՝ բացի հնչող հայտարարություններից: Սակայն, ըստ նրա, ՀՀ-ն շարունակում է հստակ շարադրել իր մոտեցումը, այն է՝ ՀՀ-ն պատրաստ է առանց նախապայմանների հարաբերությունների. սա է ապագայի ճանապարհը: Այս հարցում, նրա որակմամբ, կարևոր է ՀՀ-ի միջազգային գործընկերների ըմբռնումը:
Ինչ վերաբերում է հայ-ադրբեջանական հարաբերություններին, ապա Բաղդասարյանի փոխանցմամբ՝ մարտի 23-25-ը նախատեսվում է Ալիև-Սարգսյան հանդիպումը, և ՀՀ-ն շարունակում է հանդես գալ ԼՂ հիմնախնդրի ոչ միայն խաղաղ, այլև փոխզիջումներով կարգավորման օգտին: Նրա խոսքով՝ գնդակն Ադրբեջանի դաշտում է, քանի որ ձեռք բերված պայմանավորվածություններն իրենց շարունակությունը չեն ունենում, բայց անվտանգ ու կայուն տարածաշրջանը ոչ միայն ՆԱՏՕ-ի համար է կարևոր, այլև քաղաքակիրթ հանրության:
«ԼՂ հիմնախնդրի շուրջ պետք է կարողանանք փոխընդունելի լուծում գտնել: Տեսնում ենք Ադրբեջանի իշխանությունների ռազմատենչ քաղաքականությունը, տեսնում ենք լուրջ հակահայկական քարոզչություն, ինչը մեզ համար մտահոգիչ է: Մենք մեր ժողովրդին չենք տրամադրում պատերազմի»,- ասաց նա:
Վերջինս խոսեց նաև ՀՀ-Վրաստան հարաբերությունների կարևորության մասին: Նա նշեց, որ Վրաստանը բարենպաստ դիրք է գրավում տարածաշրջանում: Նրա խոսքով՝ ՀՀ-Վրաստան գործակցությունը շարունակվելու է հիմնվել բարիդրացիական հարաբերությունների վրա, ՀՀ-ն շահագրգռված է Վրաստանի հետ երկխոսությունը զարգացնել բոլոր ուղղություններով:
«Մենք պարտավոր ենք մեկս մյուսին աջակցելով առաջ գնալ և տարածաշրջանում խաղաղություն ստեղծել: Վրաստանը կարևոր է նաև խոշոր հայկական համայնքով: Հայ-վրացական հարաբերությունները կզարգանան, կարևոր ենք համարում, որ Վրաստանը կարողանա շարժվել բարեփոխումների իր օրակարգով, ունենա ՌԴ-ի հետ կառուցողական հարաբերություններ, քանի որ մենք հանդես ենք գալիս համադրման քաղաքականության դիրքերից: Մենք չէ, որ պետք է դատավոր լինենք տարբեր հարաբերություններում»,- ասաց Արթուր Բաղդասարյանը:
Նա նշեց նաև, որ ՀՀ-Իրան հարաբերությունները շարունակվում են արդյունավետ կերպով զարգանալ: «Խիստ դրական ենք վերաբերվում Իրանի շուրջ ծրագրի կառուցողականությանը և առկա լարվածության թուլացմանը: Հույս ունենք, որ զարգացումները դրական ընթացք կունենան»,- այսպես ավարտեց իր բացման խոսքը Արթուր Բաղդասարյանը:
Լուսանկարը` PAN Photo-ի
