Եվրամիությունը լքելու որոշման պատճառով Մեծ Բրիտանիան ենթարկվել է քաղաքական նյարդային խանգարման: Այս մասին հաղորդում է Բի-Բի-Սի-ն՝ հղում անելով բրիտանական MI6 արտաքին հետախուզական ծառայության նախկին ղեկավար Ջոն Սաուերսին:
Նրա խոսքով՝ Մեծ Բրիտանիայում քաղաքական գործիչներ կան, որոնք հավակնում են վարչապետի պաշտոնին, ինչպես պահպանողականների, այնպես էլ ընդդիմության մեջ, որոնք չունեն այնպիսի դիրք, որին սովոր էին իշխանական կառույցներում:
MI6-ի նախկին ղեկավարը նշել է, որ միայն ժամանակը կարող է ցույց տալ՝ կհասնե՞ն արդյոք հավակնողները այդ պաշտոնի համար անհրաժեշտ դիրքի: Անհանգստություն է հարուցում նաև մոտեցող Brexit-ը, քանի որ այն սպառնալիք կստեղծի Մեծ Բրիտանիայի տնտեսական կայունության համար:
Հիշեցնենք, որ Մեծ Բրիտանիայի վարչապետի պաշտոնին հավակնող՝ Լոնդոնի նախկին քաղաքապետ Բորիս Ջոնսոնը հայտարարել է, որ իր օրոք Մեծ Բրիտանիան կլքի ԵՄ-ն հոկտեմբերի 31-ին, եթե նույնիսկ Բրյուսելի հետ գործարքը չկայանա: Նրա մրցակիցը՝ երկրի ԱԳՆ ներկայիս ղեկավար Ջերեմի Հանթը, ծրագրել է երկարաձգել Եվրամիության հետ բանակցությունները, եթե դա պահանջվի: Ֆրանսիայի նախագահ Էմանուել Մակրոնի շրջապատում էլ Reuters-ին հայտնել են, որ Բրիտանիային դեֆոլտ է սպառնում, եթե մինչև ԵՄ-ից դուրս գալը չվճարի 50 մլրդ դոլար: Տեղական խորհուրդներում աջակցության մակարդակով Ջոնսոնը Հանթին գերազանցում է 22%-ով:
