«Ռուսաստանի միտումներն ակնհայտ են, Ռուսաստանի վերաբերմունքը որևէ գաղտնիք իրենից չի ներկայացնում։ Այն, ինչ Ռուսաստանը անում է հետխորհրդային տարածքում, ոչնչով չի տարբերվում մեկը մյուսից՝ նկատի ունեմ թե՛ մեզ, թե՛ Ուկրաինային, թե՛ Վրաստանին»,- «Առաջին լրատվական»-ի հետ զրույցում ասաց քաղաքագետ Արկադի Վարդանյանը։
Մեր զրուցակիցն ընդգծեց. «Այդպիսի ակնհայտ թշնամական վերաբերմունքը բացատրվում է նրանով, որ Ռուսաստանը փորձում է իր հսկողության տակ պահել ամբողջ հետխորհրդային տարածքը՝ Մերձբալթյան երկրներն անդառնալիորեն հեռացան, մնում է՝ Անդրկովկասում ձեռքերը պահեն զարկերակին, եթե դա էլ չլինի, նրանք զրկվում են որևէ ազդեցությունից, ինչն իրենց համար հավասարազոր է մահի։ Ներքին քաղաքականության անհաջողությունները, ծայրաստիճան վատ վիճակը, որը ստեղծվել է և օրեցօր ավելի է վատանում սոցիալական ոլորտում, բացատրվում է միայն արտաքին գործոններով, իրենք միշտ էլ ասում են, որ շրջապատված են մութ ուժերով ու սադրանքների են ենթարկվում»։
Արկադի Վարդանյանի կարծիքով՝ Հայաստանի նոր իշխանությունների կողմից իրականացվող քաղաքականությունը, ընդհանուր առմամբ, բազմաշերտ է. «Բայց երբեմն շատ բարդ է հասկանալ, թե ինչով է բացատրվում։ Ամիսներ շարունակ ասում եմ ու պնդում՝ չկա նախկին հանցագործ ռեժիմին քաղաքական գնահատական։ Մինչև հիմա չկա և հասկանալի չէ, թե ինչու։ Պատճառը ոչ ոք չի կարողանում հասկանալ։ Բայց եթե իրերն իրենց անուններով անվանենք, ապա պարզ կդառնա, որ պատճառը Ռուսաստանից վախն է։ Ռուսաստանն ինչ-որ լծակներ ունի, որոնցով ճնշում է, այդ թվում՝ մեր հեղափոխական իշխանություններին, կարողանում է ճնշել, այնպես անել, որ տարբեր միջազգային ատյաններում քվեարկենք Ռուսաստանի օգտին՝ ինչպես ակադեմիկոս Մարտիրոսյանն էր ասում՝ մի քանի քոսոտ երկրների հետ»։
Մեր զրուցակցի դիտարկմամբ՝ այլ պատճառաբանություն չկա. «Ներքին քաղաքականությունը քչի թե շատ կարելի է հասկանալ, չնայած այստեղ էլ շատ ժամանակ ոտները կախ են գցում, վախեցնում, չնայած այստեղ էլ տունտունիկ, մուկն ու կատու խաղալը շատ ժամանակ մարդկանց զայրացնում, վրդովվեցնում է։ Դա մարդկանց նյարդայնացնում է ու ստիպում, որ շատ ժամանակ ավելի կտրուկ մեկնաբանեն, ավելի կտրուկ խոսեն այդ մասին։ Դա, իհարկե, օրեցօր իջեցնում է իշխանության վարկանիշը, իսկ դա, անձամբ ինձ համար, մտահոգիչ է։ Ես միշտ պաշտպանել եմ հեղափոխական իշխանություններին, երիտասարդներին, աշխատում եմ իրենց համար թև ու թիկունք լինել, բայց երբեմն այնպիսի բաներ են անում, որ անհասկանալի ու անբացատրելի է»։
