Վենեսուելայի նախագահ Նիկոլաս Մադուրոն չորեքշաբթի օրն առաջին անգամ հայտարարել է, որ ավելի քան մեկ տարի առաջ մահացած Ուգո Չավեսը արտամուսնական կապից երեխաներ է ունեցել: Այս մասին գրում է Ria Novosti-ն՝ վկայակոչելով լատինաամերիկյան ԶԼՄ-ներին:
Իր հրապարակային ելույթի ժամանակ Մադուրոն հիշատակել է արդեն հայտնի Չավեսի երեխաներից բացի՝ ևս նրա 2 երեխաների՝ 5-ամյա Սառա Մանուելայի և 8-ամյա Հենեսիս Մարիայի մասին: ԶԼՄ-ների տվյալներով՝ Սառա Մանուելայի մայրը նախագահական ինքնաթիռի բորտուղեկցորդուհի Նիդիա Ֆահարդոն է:
Մինչ օրս համարվում էր, թե Չավեսը 5 երեխա ունի՝ Ռոսա Վիրհինիան, Մարիա Գաբրիելան, Ռոսինեսը, Ուգո Ռաֆայելը և Ռաուլ Ալֆոնսոն, ովքեր ծնվել են նախկին նախագահի երկու ամուսնություններից:
