Այսօր Սահմանադրության օրն է։ Պետական տոն, որը նշվում է 1995 թվականից։ Այս տարիների ընթացքում պարզ դարձավ, որ մենք շատ անլուրջ մոտեցում ունենք Սահմանադրությանը՝ որպես մեր հասարակության հարաբերությունները կարգավորող ամենակարևոր գործիքներից մեկի, և սահմանադրական հասարակություն դառնալու ճանապարհից մենք շատ հեռու ենք։ Հաշվի առնելով այսօրվա տիրող սահմանադրական ճգնաժամը և դատաիրավական համակարգի հետ կապված գործընթացները, որքանո՞վ է մեր հասարակությունը մոտ սահմանադրական հասարակություն դառնալուն «Առաջին լրատվական»-ի հարցին մշակութային մարդաբան Աղասի Թադևոսյանը պատասխանեց․ «Անկեղծ ասած՝ չեմ կարծում, որ այդ ոլորտում ինչ-որ մի բան շատ լրջորեն փոխվել է, որը մեզ կմոտեցնի պրոսահմանադրական հասարակություն դառնալուն։ Պարզապես հետհեղափոխական շրջանում, կարծես թե, իշխանությունը կրճատել է հեռավորությունը հասարակությունից կամ ժողովրդից։ Բայց արդյո՞ք այդ հեռավորության կրճատումը կարող է բերել նրան, որ մեր հասարակությունը կդառնա ավելի օրենքով ապրող։ Դա դեռ շատ լուրջ խնդիր է և կապված է ոչ միայն իշխանության դիրքորոշման հետ, այլ, ընդհանրապես, հասարակությունում գոյություն ունեցող օրենքով ապրելու ավանդույթին կամ մշակույթին։ Ես ցավով պետք է նշեմ, որ հասարակության մեջ համատարած մոտեցում չկա օրենքով և օրենքին համապատասխան ապրելու»։
«Գիտե՛ք, բացի նրանից, որ գոյություն ունի ֆորմալ Սահմանադրություն, անկեղծ ասած՝ 1995 թվականից բոլոր հանրաքվեները կասկածի տեղիք են տվել։ Հենց առաջին սահմանադրական հանրաքվեն չափազանց բացասական ավանդույթներ դրեց, և ամբողջ այդ բացասական ավանդույթները, որոնք դրվեցին 1990-96 թվականներին, շարունակվեց և եկավ հասավ 2015 թվականի հանրաքվեին։ Մենք, ըստ էության, ոչ մի փոփոխություն այդ տարիների ընթացքում չունեցանք, ցավոք, չունեցանք։ Ընդհանրապես, Սահմանադրության պահանջը հասարակության մեջ առաջացել է օրենքով ապրելու մղումից, ցանկությունից, երբ եթե ոչ ամբողջ հասարակությունը, ապա գոնե հասարակության էլիտաները գիտակցել են, որ այդպես անկանոն և չգրված օրենքների միջոցով ապրելով չեք կարող զարգանալ և առաջ գնալ, անհրաժեշտ է ձևավորել թղթի վրա գրված օրենքներ, պայմաններ, որոնց շուրջ մենք համաձայնության ենք գալիս։ Այսինքն՝ Սահմանադրության պահանջն առաջացել է հասարակության ներքին մղումից»,- հավելեց Աղասի Թադևոսյանը։
Մանրամասները՝ տեսանյութում։
