Վրաստանի նախագահ Գեորգի Մարգվելաշվիլին հաստատել է, որ կաշխատի Թբիլիսիի Հավլաբար թաղամասում գտնվող նախագահական նստավայրում, որտեղ աշխատել է երկրի նախկին նախագահ Միխեիլ Սաակաշվիլին: Այս մասին հաղորդում է RIA Novosti-ն:
Մարգվելաշվիլին նախկինում բազմիցս հայտարարել է այն մասին, որ մտադիր չէ աշխատել նստավայրում, որը կառուցվել է Սաակաշվիլիի համար: Նա որպես իր աշխատասենյակ ընտրել էր կառավարության շենքում տեղակայված գրասենյակներից մեկը: Մարգվելաշվիլին առաջարկել էր Հավլաբարի համալիրը փոխանցել վրաց-ամերիկյան համալսարանին: Ընդ որում՝ պետության ղեկավարն անցած շաբաթ մի քանի հանդիպում է անցկացրել Հավլաբարի նստավայրում:
«Մենք ուղղումներ ենք մտցրել այն ծրագրերում և հանգամանքներում, որոնցում ստիպված էինք աշխատել: Իմ ցանկությունն էր այդ շենքը դարձնել համալսարան, իմ ցանկությունն էր նաև գոնե երկու սենյակ ունենալ աշխատելու համար, հետևաբար նման որոշում կայացվեց»,- ասել է Մարգվելաշվիլին:
