Առողջապահության պետական տեսչությունում շարունակվում է քննվել Biglemon ընկերությունից տուժած մի քանի աշխատակիցների դիմումը, որով նրանք ընկերությունից պահանջում են իրենց մի քանի ամիս չվճարված աշխատավարձը:
Հիշեցնենք, որ Biglemon-ը իր մի քանի աշխատակիցների ամիսներով աշխատեցրել էր և չէր վարձատրել, բացի այդ՝ խախտել էր նաև նրանց մի շարք աշխատանքային իրավունքներ՝ չէր գրանցել, աշխատանքից ազատելուց էլ վերջնահաշվարկ չէր տվել: Աշխատակիցներն էլ դիմել են տեսչություն և ներկայացրել մի շարք փաստեր, որոնք վկայում են իրենց պահանջի հիմնավորվածությունը:
Օրեր առաջ «Քեյ Ար Ջի ինվեստ» ՍՊԸ-ի տնօրեն Ռաֆայել Կանեցյանը հակափաստարկներ էր ներկայացրել տեսչություն՝ փորձելով ապացուցել, որ ինքը վճարել է նախկին աշխատակցուհիներից Լուսինե Վարդանյանի ամբողջ աշխատավարձը, իսկ մյուս երկու աշխատակիցներին՝ Դիանա Սիմոնյանին ու Իրինա Ալավերդյանին չի ճանաչում, քանի որ նրանք, ըստ Կանեցյանի, ընդհանրապես չեն աշխատել Biglemon-ում: Հիշեցնենք, սակայն, որ ընկերության կողմից տեսչություն ներկայացված փաստաթղթերում, որոնք իբր ապացուցում էին, որ Լուսինե Վարդանյանը ստացել է իր բոլոր ամիսների աշխատավարձը, ստորագրությունների մեծ մասը կեղծված էր, իսկ մի քանի ամսվա դիմաց նույնիսկ ստորագրություն չկար: Իսկ մյուս աշխատակցուհիները ներկայացրել էին մի շարք լուսանկարներ, ինտերնետային նամակագրության պատճեններ, տեսագրություններ, որոնք նույնպես փաստում էին, որ նրանք աշխատել են Biglemon-ում:
Այսօր Ռաֆայել Կանեցյանը լրացուցիչ առարկություններ է ներկայացրել տեսչությանը: Կանեցյանը պնդում էր, որ Լուսինե Վարդանյանի ստորագրությունը կեղծված չէ, ինչպես նաև ներկայացրել էր մի շարք դրամարկղային օրդերներ, որոնք, ըստ նրա, վկայում են, որ դրամարկղից գումար է դուրս գրվել աշխատավարձերի վճարման համար:
Լուսինե Վարդանյանը, սակայն, «Առաջին լրատվական»-ին ասաց, որ ինքը հետամուտ է լինելու, որպեսզի այս խնդիրը վերջնական լուծում ստանա: Մասնավորապես ստորագրության փորձաքննության կդիմի, որպեսզի ապացուցվի, որ իր ստորագրությունը կեղծվել է: Բացի դա, նրա խոսքով, Կանեցյանի ներկայացրած դրամարկղային օրդերները, դրամարկղից դուրս գրված գումարը չեն ապացուցում, որ նա աշխատավարձ է վճարել:
«Էքսպերտիզան կպարզի` իմ ստորագրությունը կեղծվել է, թե ոչ: Իսկ ինչ կասեն, որ մի քանի ամսվա դիմաց նույնիսկ ստորագրություն չկա: Կանեցյանն ամեն կերպ փորձում է մոլորեցնել տեսչության աշխատողներին, թե ես կոմերցիոն տնօրեն չեմ եղել և այլն, բայց բազմաթիվ ապացույցներ կան, ես տարբեր հաղորդումների եմ մասնակցել, որտեղ ներկայանում եմ որպես Biglemon-ի կոմերցիոն տնօրեն: Ինչի մասին է խոսքը»,- ասաց Լուսինեն՝ ավելացնելով, որ անկախ Biglemon-ի ներկայացրած առարկություններից, ակնհայտ է, որ իրենք են հայտնվել խաբվածի կարգավիճակում, և տեսչությունը պարտավոր վերականգնել իրենց խախտված իրանունքները՝ պարտավորեցնելով ընկերությանը վճարել իրենց չվճարված աշխատավարձը:
Լուսանկարում՝ Biglemon ընկերության նախկին և ներկա աշխատակիցները՝ «Քեյ Ար Ջի ինվեստ» ՍՊԸ-ի տնօրեն Ռաֆայել Կանեցյանի հետ:
