Դատախազության օրվա առիթով ունեցած ելույթում վարչապետ Նիկոլ Փաշինյանը դրական է գնահատել գլխավոր դատախազության հետհեղափոխական մեկ տարվա աշխատանքը՝ շեշտելով, որ դրական, իհարկե, չի նշանակում անթերի: Վարչապետը փաստացի իր այդ գնահատականով աջակցություն է հայտնել գլխավոր դատախազ Արթուր Դավթյանին: Այստեղ, անշուշտ, առաջնային ուշադրության կամ մեկնաբանությունների առարկա է դառնում Ռոբերտ Քոչարյանի գործն ու դրանում դատախազության աշխատանքը:
Անկասկած է, որ մի մեծ շրջանակ հենց այդ ներքին տիրույթում են գնահատելու վարչապետի աջակցության հանգամանքը: Սակայն դատախազության օրվա առիթով գլխավոր դատախազին վարչապետ Փաշինյանի ցուցաբերած աջակցությունն ունի շատ ավելի նշանակալի և ընդգրկուն ֆոնային ուղեկցում և դիտարկման է արժանի, թերևս, այդ լայն համատեքստում: Խոսքն այն մասին է, որ հունիսի 25-ին գլխավոր դատախազ Արթուր Դավթյանը հյուրընկալել էր մինչ այդ Ռոբերտ Քոչարյանին և Հրայր Թովմասյանին հանդիպած ՌԴ դեսպան Սերգեյ Կոպիրկինին: Այդ հանդիպման մասին դատախազության տարածած պաշտոնական հաղորդագրության զգալի մասը զբաղեցնում էր հիշատակումը, որ գլխավոր դատախազ Արթուր Դավթյանը դեսպանի հետ զրույցում շեշտել է Հայաստանում հեղափոխությունից առաջ անօրինական հարստության, անօրինական սեփականության բռնագանձման, Հայաստանից արտերկիր տեղափոխված ռեսուրսների վերադարձի, այդ ուղղությամբ տարվող աշխատանքի, արտաքին գործընկերների հետ գործակցության մասին:
Այլ կերպ ասած, գլխավոր դատախազը ՌԴ դեսպանի հետ հանդիպմանը բարձրացրել է Հայաստանի հանրությունից և պետությունից խլված ռեսուրսների վերադարձի հարցը, ինչը խոշոր հաշվով նշանակում է Հայաստանի նախկին իշխող համակարգի տարբեր ներկայացուցիչների՝ Ռուսաստանում ունեցած կապիտալի հարցը: Թե հատկապես անվանապես ում մասին է խոսքը, ինչ ռեսուրսների մասին և ինչ մեխանիզմների շրջանակ է դիտարկվել զրույցի ընթացքում, ինչ է ասել դեսպանը, սա, իհարկե, մանրամասներով հայտնի չէ: Սակայն հարցադրման առկայությունն ինքնին համարձակ է և աննախադեպ: Դրանով հանդերձ, անկասկած է, որ այն չէր կարող քաղաքական առումով համաձայնեցված չլինել վարչապետ Փաշինյանի հետ: Պետք չէ բացառել իհարկե, որ զրույցի «առիթը» ձևավորվել է ավելի վաղ Սանկտ Պետերբուրգում Փաշինյան-Պուտին հանդիպումով: Միայն պետք է հասկանալ՝ դրանից հետո ՌԴ դեսպանի առաջ այդպիսի հարցադրումը այդ հանդիպմանը ձեռք բերած պայմանավորվածությա՞ն արդյունք է, որին հաջորդում է արդեն կոնկրետ քննարկումը դատախազության հետ, թե՞ հակառակը՝ որևէ հարցում չպայմանավորվելու, ինչից հետո Երևանը գլխավոր դատախազության միջոցով հավելյալ փաստարկներ է ներկայացրել Մոսկվայի առաջ՝ դեսպանի հետ հանդիպմանը: Բոլոր դեպքերում, դրանից հետո հատկանշական է Նիկոլ Փաշինյանի քաղաքական գնահատականն ու աջակցությունը դատախազության աշխատանքին, ինչը նշանակում է, որ վարչապետը դրական է գնահատել ՌԴ դեսպանի հետ հանդիպմանը դատախազի ցույց տված «արդյունքը»: