Լեռնային Ղարաբաղում պատերազմի վերսկսման մասին այսօր շատերն են խոսում, խոսվում է նաև Հայաստանի և Ադրբեջանի ռազմական կարողությունների մասին, և անընդհատ ընդգծվում է մի հանգամանք, որ եթե այսօր պատերազմ սկսվի, ապա այն չի լինելու այնպիսին, ինչպիսին եղել է 90-ականներին:
Ռուսական քաղաքական և ռազմական վերլուծությունների ինստիտուտի ղեկավար, պահեստազորի գնդապետ Անատոլի Ցիգանոկը «Առաջին լրատվականի» հետ զրույցում նկատեց, որ այսօր պետք չէ մոռանալ, որ Ադրբեջանի ռազմական բյուջեն գերազանցում է Հայաստանի ողջ բյուջեն, սակայն դա դեռևս չի նշանակում, որ Ադրբեջանը պատերազմը կվերսկսի: Ցիգանոկի գնահատմամբ՝ ադրբեջանական ռազմական հայտարարությունները բավականին անմեղսունակ են. «Կարծում եմ՝ Հայաստանի և Ադրբեջանի միջև բանակցությունները ինչպես ընթանում են, այդպես էլ կշարունակվեն, իսկ այդ ամենը ներքին օգտագործման համար արված հայտարարություններ են»:
Ցիգանոկը նշեց, որ պատերազմ չի լինի հենց միայն այն պատճառով, որ ղարաբաղյան կոնֆլիկտի մեջ ներքաշված պետությունները՝ ԱՄՆ-ը, Ռուսաստանը, Ֆրանսիան, նման հետաքրքրություն չունեն, ավելին՝ այս բոլոր երկրներում գործում է հայկական մեծ լոբբի, որն, ըստ Ցիգանոկի, բավականին մեծ կշիռ ունի պատերազմի վերսկսումը կանխելու գործում:
Այդուամենայնիվ, համեմատելով Ադրբեջանի և Հայաստանի ռազմական հնարավորությունները՝ Ցիգանոկը նշեց, թե պետք է հաշվի առնել, որ Հայաստանի և Ադրբեջանի ռազմական տեխնիկայի մեծ մասը ռուսական արտադրության է, սակայն Ադրբեջանն այսօր զենք է գնում նաև Արևմուտքից՝ Իսրայելից, Վարշավայի համագործակցության պայմանագրի նախկին երկրներից:
Ռուս ռազմական փորձագետը նաև մի հետաքրքիր համեմատություն արեց: Նրա խոսքերով, հայկական բանակը տարբերվում է ադրբեջանականից ավանդույթների առումով: Ցիգանոկի խոսքերով Ադրբեջանի բանակն այսօր պատրաստվածություն է անցնում ՆԱՏՕ-ի մասնագետների կողմից և հենց այդ հիմքի վրա է զարգանում, իսկ Հայաստանի բանակը պատրաստվում է ռուսական ռազմական դպրոցի ավանդույթների հիման վրա. «Կարծում եմ՝ ռուսական ռազմական ավանդույթներով պատրաստված հայկական բանակը հաստատ արժանի հակահարված կտա ՆԱՏՕ-ի կողմից պատրաստված ադրբեջանական բանակին»: