Հունիսի 26-ին և 28-ին Երևանի Կոմիտասի անվան պետական կոնսերվատորիայի Ղազարոս Սարյանի անվան օպերային ստուդիայի դահլիճում ՀՀ կրթության, գիտության, մշակույթի և սպորտի նախարարության աջակցությամբ, Ա. Տիգրանյանի անվան երաժշտական դպրոցի սաների մասնակցությամբ կկայանա Ստեփան Ջրբաշյանի «Գիքոր» օպերայի երկրորդ ծնունդը. բեմադրությունը նվիրված է Հ. Թումանյանի ծննդյան 150 ամյակին:
«Գիքոր» օպերան կներայացվի նաև ՀՀ մարզերում. հուլիսի 1-ին՝ Վանաձորի Հ. Աբելյանի անվան դրամատիկական թատրոնում, հուլիսի 4-ին`Գյումրու Ա. Աճեմյանի անվան դրամատիկական թատրոնում: Այս նախագծի գլխավոր հովանավորներն են ամերիկաբնակ բարերարներ՝ Կարո և Սիրվարդ Կավուկչյանները: Նախագծի ղեկավարն է Երևանի Ա. Տիգրանյանի անվան երաժշտական դպրոցի տնօրեն Անահիտ Գևորգյանը, կազմակերպիչներն են Ա. Տիգրանյանի անվան երաժշտական դպրոցը և Մշակութային կրթության աջակցության հիմնադրամը:
«Ձայնային տաղանդը ժառանգել եմ մայրական կողմից՝ տատիկս, մորեղբայրս և մայրս օպերային թատրոնի արտիստներ են, իսկ լոռեցու պարզությունն ինձ փոխանցվել է հայրական կողմից: Տարիներ շարունակ ամառային արձակուրդս անցկացրել եմ Լոռիում, անձամբ զգացել Լոռվա բնության գրկում ապրելու հմայքը: Այս ամենին գումարվել է նվիրյալ ուսուցիչներիս ջանքերը, հավատն իմ ուժերի նկատմամբ, ինչն էլ վստահություն է ներշնչել, որ կկարողանամ պատվով կատարել այս դերը»,- «Առաջին լրատվական»-ի հետ զրույցում այս մասին ասաց Գիքորի 12-ամյա դերակատար Անի Թամազյանը, ով նաև արդեն հասցրել է «Անուշ» մանկական օպերայում մարմնավորել է Անուշի կերպարը:
Երջանիկ պատահականությամբ, թե նախախնամությամբ, երբ փնտրվում էր Գիքորի դերակատար, ընտրությունը կանգ է առնում ոչ թե տղա կատարողի, այլ Անի Թամազյանի վրա, հետագայում պարզվում է, որ նա Գիքորի երկարամյա դերակատար Ասյա Հայրապետյանի թոռնուհին է: «Իմ վաղեմի երազանքը անսպասելիորեն իրականություն դարձավ, «Գիքորը» կրկին բեմադրվում է, այն էլ թոռնիկիս մասնակցությամբ»,- նշում է փորձառու դերակատարը, ով իր խորհուրդներով նպաստել է «Գիքորի» նոր ծնունդի իրականացմանը:
Հայ մեծանուն կոմպոզիտոր Ստեփան Ջրբաշյանը Հովհաննես Թումանյանի համանուն պատմվածքի հիման վրա 1973 թ. ստեղծել է «Գիքոր» օպերան: Այն առաջին անգամ բեմադրվել է 1974 թվականին և մինչև 1986 թվականը, եղել է թատրոնի խաղացանկում, որից հետո շուրջ 30 տարի այն չի բեմադրվել: Որոշ հանգամանքների բերումով օպերայի պարտիտուրան կորել է։
2018 թ. Երևանի Արմեն Տիգրանյանի անվան երաժշտական դպրոցի տնоրեն Անահիտ Գևորգյանը, հայտնի օպերային երգչուհի Աննա Նշանյանի հորդորով, նրա թոռ՝ օպերային երգիչ և ռեժիսոր Արման Նշանյանի և ամերիկաբնակ բարերար, դպրոցի բարեկամ՝ Սիրվարդ Կավուկչյանի հետ քննարկումների արդյունքում ձեռնամուխ է լինում «Գիքոր» օպերայի վերածննդի նվիրական գործին։ Նրա խնդրանքով օպերային թատրոնի գրադանավարուհի Նազելի Մինասյանի ջանքերով գտնվում են օպերայի նվագախմբի գրեթե բոլոր գործիքների պարտիաները և դաշնամուրային կլավիրը։
Պարտիտուրի վերականգնումը և համակարգչային շարվածքը կատարում է դպրոցի երգչախմբի խմբավար Ռուբեն Կարասեֆերյանը։
Երևանի պատվավոր մանկավարժ Շաքե Աշչյանի սաները և դպրոցի երգեցողության մյուս դասատուների աշակերտները՝ կոնցերտմայստեր Ռուզան Վարոսյանի աջակցությամբ, և դպրոցի «Տիգրանյան» նվագախումբը՝ ՀՀ վաստակավոր արտիստ, դիրիժոր Հայկ Հովակիմյանի գլխավորությամբ, սկսում են օպերայի փորձերը։
Պարային բեմադրությունը իրականացրել է դպրոցի «Real dance» պարային խմբի պարուսույց Գոռ Մկրտչյանը։ Իրենց մասնակցությունն ունեն նաև դպրոցի «Արտիստ» թատերական ստուդիայի սաները։ Բեմադրության հեղինակը և բեմանկարիչը ռեժիսոր Նարինե Թարզիմկոյանն է։ Գլխավոր դերերում հանդես կգան՝ Գիքոր՝ Անի Թամազյան, Համբո` Հակոբ Արզումանյան, Սալբի` Մարիամ Վարդումյան, Բազազ Արտեմ` Կարո Այրումյան, Նատո` Լիանա Այրումյան, Դեդի` Աղավնի Հարությունյան: Նախագծում ներգրավված է շուրջ 150 մասնակից:
Գայանե Ալավերդյան