Բողոքի ալիք բարձրացրած ազատամարտիկների պառակտումն օր օրի ավելի ակնառու է դառնում: Բանը հասել է նրան, որ այսօր ազատամարտիկների մի թևը մյուսին մեղադրում է Վոլոդյա Ավետիսյանի գործին առնչություն ունենալու մեջ:
Մասնավորապես, այսօր հրավիրված մամլո ասուլիսի ընթացքում ամիսներ առաջ սոցիալական հարցեր բարձրացրած ազատամարտիկ Վոլոդյա Ավետիսյանի մարտական ընկեր Յուրա Աթոյանը, վրդովված դիմելով լրագրողներին, հարցրեց՝ ո՞ւր է հիմա պահեստազորի գնդապետ Խաչիկ Ավետիսյանը, ինչո՞ւ հեղափոխություն չի անում, ապա հայտարարեց, որ գուցե նրա «մատը խառն է» Վոլոդյա Ավետիսյանի «գլխին գործ սարքելու մեջ»։
«Խաչիկ Ավետիսյանը՝ Վոլոդյայից անմիջապես հետո, խմբեր բացեց օպերայի շենքի մոտ, երբ Վոլոդյան սոցիալական խնդիրների բարձրացման համար նստացույց էր անում:
Հիմա Վոլոդյան փակված է, իսկ Խաչիկն անհետ կորած է: Եթե այդքան ազգասեր տղա է ու իր մատը խառը չէ այս ամենի մեջ ու չի գործում ուրիշի նոտաներով, թող սրանից հետո չընկնի մեր ոտքերի տակ: Խնդրում ենք՝ հեռանա: Ինքն ու իր նմանները շինեցին Վոլոդյայի գլխին: Եթե ինքը սրտացավ էր երկրապահի կամ կռվող տղերքի համար, թող գար մեր կողքին կանգներ, ո՞ւր է կորել պարոն Խաչիկը»,- հայտարարեց Աթոյանը:
Ազատամարտիկ Գագիկ Սարուխանյանին բազմիցս տեսել ենք և՛ համակարգային փոփոխություններ պահանջող ազատամարտիկների հանրահավաքաներին, և՛ «Ի պաշտպանություն Վոլոդյա Ավետիսյանի» ակցիաներին ու երթերին: «Առաջին լրատվական»-ը նրանից հետաքրքրվեց , թե ի՞նչ կարծիքի է Աթոյանի մեղադրանքների առնչությամբ, կիսո՞ւմ է դրանք, թե՞ ոչ: Ի պատասխան՝ Սարուխանյանն ասաց․ «Ի սկզբանե չի կարելի վանել քո մարտական ընկերներին, ընդվզող խմբերին։ Բայց այդ ընդվզող խմբերի պահվածքը շատ է նման իշխանական ոճին, այսինքն՝ մենք ենք ու վերջ: Չկա դիմացի խմբի տղաներին լսելու ցանկություն՝ եթե մեզ հետ չեք, ուրեմն պիտանի չեք: Մենք «մալական» մականունով մի ընկեր ունենք՝ Կարենը, ասում են՝ կռվե՞լ է նա, թե՞ ոչ:
Նմանատիպ բաներ տարածելն ինձ համար անհասկանալի է, բայց ընթացքում քիչ-քիչ ամեն ինչ տեղն է գալիս՝ ես հասկանում եմ՝ իրենք կամ ամբիցիոզ են, կամ «պրոյեկտ»»:
Հետաքրքրվեցինք նաև, թե կիսո՞ւմ է Աթոյանի այն տեսակետը, թե Խաչիկ Ավետիսյանի մատը խառն է Վոլոդյա Ավետիսյանի գործում: Գագիկ Սարուխանյանն ասաց. «Ես չեմ կարծում, որ Խաչիկ Ավետիսյանն այնպիսի գործիչ է, որ իր սարքածը լինի, բայց եթե անգամ ուղղորդվող է, ապա նրանք առաջատար դեմքեր չեն: Ես ուղղակի կարող եմ նրան բնորոշել որպես կարճատես և անհեռանկարային գործիչ. ինչպե՞ս կարելի է փոքր հարցերում այլ դիրքորոշում ունեցող մարդկանց քարկոծել: Ես միշտ ասել եմ՝ տղաներ են, մեր հասցեին ինչ-որ բան են ասել, գուցե այդ պահին նյարդերն են թուլացել, բայց այսպիսի շարունակական պահվածքը արդեն որոշակի մտահոգություններ է առաջացնում: Ինչ որ ասում է Յուրան՝ իր կարծիքն է, ես հիմա նման գնահատականներ չէի ուզենա տալ»:
Պահեստազորի փոխգնդապետ, ազատամարտիկ Խաչիկ Ավետիսյանը «Առաջին լրատվական»-ի հետ զրույցում անդրադառնալով իրեն հասցեագրված մեղադրանքներին՝ ծիծաղեց, ապա ասաց. «Եթե Վոլոդյայի բանտախցում տեղ կա, գնամ կողքը նստեմ, թող հանգստանա: Այդ հայտարարությունը ապուշություն է: Նա շատ լավ գիտի՝ ես որտեղ եմ, հարցեր ունի՝ թող գա ինձ տեսնի»:
