ԼՀԿ խմբակցության պատգամավոր Արման Բաբաջանյանը ֆեյսբուքյան իր էջում գրել է․
«Հաշվեքննիչ պալատի նախագահ Լևոն Յոլյանը խորհրդարանում իր եզրափակիչ ելույթում այսօրվա իմ ելույթին՝ հայտարարելով, թե կոռեկտությունից ելնելով ու ԱԺ ամբիոնի նկատմամբ իր ունեցած հարգանքը հաշվի առնելով՝ մանրամասն չի անդրադառնում իմ խոսքին: «Ելույթը պարունակում էր խեղաթյուրված փաստեր, որոնց միջոցով փորձ կատարվեց ստվեր նետել Հաշվեքննիչ պալատի և իմ համբավի վրա: Թե պատճառը ո՞րն է, ո՞ւմ պատվերով՝ այս պահին դժվար է ասել, այդուհանդերձ, նշեմ, որ այդ ելույթը պարունակում է ստեր»,- հայտարարեց Յոլյանը։
Իրականում եթե պարոն Յոլյանն առաջնորդվեր կոռեկտությամբ ու ԱԺ ամբինոի նկատմամբ հարգանքով, ինչպես իմ ելուևյթում էի նշել, պետք է հրաժեշտի խոսք ասեր ու հեռանար զբաղեցրած պաշտոնից։ Ինչ վերաբերում է իմ ելույթում տեղ գտած փաստերին, որոնք պարոն Յոլյանն անվանում է խեղաթյուրված, ապա նշեմ, որ դրանց մի մասը պետական ռեգիտսրում գրանցված տվյալներ են, մյուսները՝ տարբեր տարիների մամուլի հրապարակումներ։
Այսպիսով, պարոն Յոլյանը խեղաթյուրված է համարում պետռեգիստրի տվյալները, այսինքն՝ կասկածի տակ է դնում պետական այդ կառույցի լեգիտիմությունը։ Ինչ վերաբերում է մամուլի հրապարակումներին, ապա ուշագրավ է, որ անցած տարիներին տարբեր պաշտոններ զբաղեցրած Լևոն Յոլյանը գեթ մի անգամ չի հերքել մամուլում իր և իր ընտանիքի մասին ներկայացված տեղեկությունները։
Լևոն Յոլյանը, ինչպես նշել եմ իմ ելույթում, ամբողջությամբ համապատասխանում է նախկին հանցավոր համակարգի ներկայացուցչի չափորոշիչներին, ինչի վկայությունն է նաև նրա կողմից իմ ելույթի հետևում «պատվեր» որոնելու մոլորությունը, ինչը բնորոշ էր հին Հայաստանի էլիտաներին։
Պարոն Յոլյանի համար խորթ է, որ Ազգային Ժողովի պատգամավորները կարող են կատարել իրենց տրված մանդատից բխող, այն է՝ հանրության պատվերը։ Իսկ եթե նա ցանկանում է վերականգնել իր արժանապատվությունը, որին իբրև վնաս է հասցվել իմ ելույթով, ապա պատրաստ եմ իմ հայտարարությունները կրկնել և պաշտպանել դատարանում։
