Վերաքննիչ քրեական դատարանում սկսվեց Քաղաքագետների միության նախագահ Հմայակ Հովհաննիսյանի գործով բերված վերաքննիչ բողոքի քննությունը:
Գործը քննվել է Կենտրոն և Նորք-Մարաշ վարչական շրջանների ընդհանուր իրավասության դատարանում Գագիկ Պողոսյանի նախագահությամբ:
Հմայակ Հովհաննիսյանը մեղավոր է ճանաչվել այն բանի համար, որ 2012 թվականի ապրիլի 21-ին, ժամը 10-ն անց 30-ի սահմաններում Երևանի Մոսկովյան 34 «ա» հասցեում գտնվող «Հայհիդրոէներգանախագիծ» ինստիտուտի մուտքի դիմաց, վիճաբանության ժամանակ դրսևորել է հանցավոր անփութություն իր գործողության ու դրա վտանգավոր հետևանքների նկատմամբ, հրել է նույն ինստիտուտի տնօրենների խորհրդի նախագահ Սենիկ Ջուլհակյանին:
Վերջինս «մարմնով ու ձախ ձեռքով համահարվածել է մուտքի դռան մետաղե շրջանակին, կորցրել է հավասարակշռությունը և գլորվել բազալտե աստիճանահարթակից: Նրա առողջությանը պատճառվել է տևական քայքայումով միջին ծանրության վնաս՝ ձախ սրունքի արյունազեղման, ձախ ձեռքի երրորդ ու հինգերորդ մատների չտեղաշարժված կոտրվածքների ձևով:
Դատարանը հաստատված է գնահատել, որ տուժող Սենիկ Ջուլհակյանի գլխավորությամբ ընկերության աշխատակիցները դուրս են եկել աշխատավայրից՝ «Հենարան» ակումբում իրենց հրավիրած մամլո ասուլիսին մասնակցելու համար: Նրանք ցանկացել են նախորդ օրը մամլո ասուլիսում Հմայակ Հովհաննիսյանի կողմից իրենց ինստիտուտի վաստակաշատ կոլեկտիվի ու Սենիկ Ջուլհակյանի հասցեին թույլ տրված բացասական արտահայտությունների վերաբերյալ իրենց կարծիքը հայտնել:
Նույն պահին շենքի առաջին հարկում տեղակայված գրասենյակ է ցանկացել մտնել Հմայակ Հովհաննիսյանը: Ինստիտուտի աշխատակիցները առաջարկել են նրան իրենց հետ գնալ ասուլիսի ու իր հայտարարությունների կապակցությամբ պարզաբանում կատարել:
Հմայակ Հովհաննիսյանը չի ընդունել առաջարկը, բայց տեսնելով աշխատակիցների վրդովմունքը, ասել է, թե հետո կմիանա նրանց:
Երբ ինստիտուտի աշխատակցուհիները պնդել են միասին ասուլիսի գնալու պահանջը, Հմայակ Հովհաննիսյանը նրանց անվանել է «Լֆիկ Սամվելի վարձու կանայք»: Կանայք վիրավորվել են:
Տուժող Ջուլհակյանը Հովհաննիսյանից պահանջել է ներողություն խնդրել: Վերջինս հրաժարվել է, պահանջել մի կողմ քաշվել ու բացել ճանապարհը: Նա սեղմել է գրասենյակի մուտքի դռան զանգի կոճակը: Բայց տուժող Ջուլհակյանը պնդել է իր պահանջը:
Այդ պահին ներսից բացվել է մուտքի դուռը: Ցանկանալով ներս մտնել՝ Հմայակ Հովհաննիսյանը, ըստ դատական ակտի, հրել է Ջուլհակյանին, ու վերջինս ընկել է:
Այնուամենայնիվ, նա, արյունոտ մատով, մասնակցել է ասուլիսին, հետո նոր դիմել է բժշկական օգնության: Սկզբում հայտարարել է, թե ընկել է բակում, հետո՝ թե ձեռքը մնացել է դռան տակ: Իր ասելով՝ սպասել է, որ Հովհաննիսյանը ներողություն խնդրի:
Բայց Հովհաննիսյանը ներողություն չի խնդրել, Ջուլհակյանն էլ ոստիկաններին պատմել է եղելությունը:
Հմայակ Հովհաննիսյանն իրեն մեղավոր չի ճանաչել ու չի ճանաչում: Նա պնդել է, թե Ջուլհակյանին չի հրել, նրա հետ ֆիզիկական շփման մեջ ընդհանրապես չի եղել: Հնարավոր է, որ Ջուլհակյանի մատը դիպել է գրասենյակի մուտքի կիսաբաց դռանն ու վնասվել է:
Տուժողը պնդել է իր ցուցմունքը:
Ընդհանուր իրավասության դատարանը ՀՀ քրեական օրենսգրքի 121 հոդվածի 1-ին մասով մեղավոր է ճանաչել Հմայակ Հովհաննիսյանին, դատապարտել 100 հազար դրամ տուգանքի, ապա համաներման կիրառմամբ ազատել է պատժի կրումից:
Վերաքննիչ բողոքը բերել է ամբաստանյալ Հմայակ Հովհաննիսյանը՝ պնդելով, թե ինքն անմեղ է, այս քրեական գործը քաղաքական հետապնդման արդյունք է: Նա այսօր մինչև դատական նիստի սկսվելն ասաց, թե Ջուլհակյանն ու իր աշխատակիցները փորձել են փակել պատգամավորության թեկնածուի ճանապարհը, խոչընդոտել են իր մուտքը իր իսկ գրասենյակ: Եթե այդ կանայք վիրավորվել էին իր արտահայտությունից, թե նրանք «Լֆիկ Սամվելի վարձու կանայք են», ապա ինչո՞ւ են համացանցում հենց իրենք էլ տարածել այդ արտահայտությունը:
Ամբաստանյալը պահանջում է բեկանել մեղադրական դատավճիռը, կայացնել արդարացման դատական ակտ:
Վերաքննիչ քրեական դատարանում Հմայակ Հովհաննիսյանի շահերը պաշտպանելու է նախկին դատախազ, ներկայումս փաստաբան Սերյոժա Աբրահամյանը:
Այսօրվա նիստին չէին ներկայացել մեղադրողը և տուժողը: Վերջինս խնդրել էր գործը քննել իր բացակայությամբ: Մեղադրողի բացակայության պատճառները դատարանին անհայտ էին:
Հովհաննիսյանն ու իր շահերի պաշտպանը կարծիք հայտնեցին, որ դատական նիստը կարելի է շարունակել մեղադրողի բացակայությամբ:
Բայց դատարանը հետաձգեց նիստը, որովհետև արդարացման հիմքով բողոքի քննությանը անհրաժեշտ համարեց մեղադրանքը պաշտպանողի ներկայությունը:
Հաջորդ դատական նիստը տեղի կունենա մարտի 31-ին:
Հիշեցնենք, որ ՀՔՄ-ն նախօրեին հաղորդագրություն էր տարածել, որում մասնավորապես ասվում էր, որ քրեական հետապնդման անվան տակ երկու տարուց ավել շարունակվող խայտառակ քաղաքական հալածանքը, որը սկսվեց ՔՀՄ նախագահի 2012 թվականի ԱԺ ընտրություններին «Բարգավաճ Հայաստան» կուսակցության ընտրացուցակով մասնակցությունից և միասնական ընտրական շտաբի աշխատանքների համակարգումից, Հմայակ Հովհաննիսյանի պատգամավորական մանդատից հրաժարվելու պատճառ դարձավ, նշանավորվեց ՀՔՄ կենտրոնական գրասենյակի մուտքի ավերումով, թևակոխում է Եվրադատարան հասնելու կարևորագույն հանգրվան:
Այս գործը գալիս է ևս մեկ անգամ բացահայտել ու քաղաքական հաշվեհարդարների նպատակով դատաիրավական համակարգի օգտագործման տեխնոլոգիաների ամբողջական զինանոցը, ցույց տալու Հայաստանում հրապարակային քաղաքական գործունեության նկատմամբ ամեն գնով կոշտ վերհսկողություն իրականացնելու իշխանությունների ձգտումը, այդ ձգտման չբավարարաման դեպքում դատական հետապնդումների անխուսափելիությունը:
