Պահքը լավ միջոց է՝ օրգանիզմը մաքրելու ձմռանը կուտակված անպետք նյութերից: Պահքը նաև լավ միջոց է մարմինը նոր էներգիայով սնելու: Այսօր տեղի ունեցած մամուլի ասուլիսի ժամանակ այս մասին ասաց արևելյան բժշկության մասնագետ Հասմիկ Խաչատրյանը:
«Մարդիկ դարերով հետևել են Պահքին և գիտեն, որ գարնանը պահանջվում է բեռնաթափել օրգանիզմը, մաքրել այն: Գարնանը, որպես կանոն, հաճախ սրվում է լյարդի հիվանդություններով տառապողների վիճակը: Այդ է պատճառը, որ, արևելյան բժշկության սկզբունքով, գարնանը պետք է ուշադիր լինել լյարդի նկատմամբ: Նույն արևելյան բժշկության համաձայն՝ լյարդը սրտի մայրն է, և եթե առողջ չէ մայրը, ապա նա չի կարող պատշաճ խնամել իր զավակին:
Գունաթերապիայի սկզբունքով, լյարդի գույնը կանաչն է, նրան հատուկ է զայրույթի էներգիան: Եթե մարդը լյարդի հետ խնդիրներ ունի, ապա նա դյուրագրգիռ է, ցրված»,- ասաց Հասմիկ Խաչատրյանը:
Արևելյան բժշկության մասնագետի խոսքով, ամռանը պետք է զգույշ լինեն հատկապես սիրտ-անոթային հիվանդություններով տառապող մարդիկ, իսկ ահա աշնանը՝ թոքերի հետ խնդիրներ ունեցողները: «Ինչ վերաբերում է ձմռանը, ապա այդ սեզոնին սրվում են հատկապես երիկամային հիվանդությունները: Արևելյան բժշկության սկզբունքներից մեկն էլ օրգանիզմը առողջ սնունդ ընդունելով մաքրելն է՝ բրինձ, ծովամթերք և այլն»,- ասաց Հասմիկ Խաչատրյանը:
Ամփոփելով՝ մասնագետը նշեց, որ արևելյան բժշկության մեջ՝ լյարդի օրինակով, սիրտը, թոքերն ու երիկամները ևս ունեն իրենց հատուկ գույները՝ համապատասխանաբար՝ կարմիր, սպիտակ և սև:
