Քննչական կոմիտեի կողմից ԲՀԿ նախագահ Գագիկ Ծառուկյանին Աբովյանի քաղաքապետի ընտրություններից մեկ օր առաջ տեղի ունեցած միջադեպով պայմանավորված հարցաքննության կանչելուց և նրա կողմից հարցաքննության չներկայանալու փաստով պայմանավորված Աբովյանի քաղաքապետի ընտրությունների թեման դեռևս համարվում է չփակված։
Հիշեցնենք, որ ընտրություններից մեկ օր առաջ Աբովյանում հրկիզվեց «Քաղաքացիական պայմանագիր» կուսակցության թեկնածուի ենթաշտաբի պետի ավտոմեքենան ու բնակարանի մուտքը։ Միջադեպից հետո Գագիկ Ծառուկյանը հայտարարել էր, որ դա «սարքած գործ է», ինչի համար էլ նրան հրավիրել էին հարցաքննության՝ հասկանալու համար, թե որտեղից նրան նման տեղեկություններ։
Իշխանության ներսում ևս այս օրերին դեռևս ակտիվ քննարկվում, վերլուծվում են Աբովյանի ընտրությունների արդյունքները։ Ընտրությունների արդյունքների վերլուծության անհրաժեշտության մասին նախօրեին խոսեց նաև վարչապետ Նիկոլ Փաշինյանը լրատվամիջոցներից մեկին տված հարցազրույցում։
Աբովյանի նախկին քաղաքապետ, ՀԱԿ անդամ Գրիգոր Ոսկերչյանի խոսքերով՝ իշխանությունը Աբովյանում պարտվեց թերևս իր մեծամտության և ինքնավստահության պատճառով, թեև, գրանցված արդյունքները Ոսկերչյանը համարում է լավ արդյունք։
«Արդյունքները լավ էին հատկապես ձայների փոքր տարբերության մասով։ Ժողովրդավարական են այն ընտրությունները, որոնց ժամանակ ձայների տարբերությունը փոքր է։ Մեծ տարբերությունները կասկածներ են առաջացնում։ Իսկ ընդհանուր առմամբ կարող եմ ասել, որ իշխանության թեկնածուն պարտվեց հիմնականում «Իմ քայլի» թիմի անփորձության, քաղաքական մշակույթի պակասի պատճառով։ Պարտության հիմնական պատճառներից մեկը քաղաքական մշակույթի պակասի, կոնսուլտացիաների, համապատասխան բանակցությունների չգնալն էր»,- ասաց Ոսկերչյանը՝ հավելելով, որ իշխանությանը թվում էր, որ մարդիկ իներցիայով, հեղափոխության ալիքի վրա պետք է գնային ու ընտրեին իրենց թեկնածուին, բայց այդպես չի լինում։ Այդպես չի լինում հատկապես տեղական ընտրությունների ժամանակ, որոնք էականորեն տարբերվում են համապետական ընտրություններից։ «Համապետական ընտրությունների ժամանակ տարբեր ուժերի հետ համագործակցում են, կոնսուլտացիաներ են լինում, կարծիքներ են փոխանակվում, իսկ այդ դեպքում դա չարվեց։ Բայց պետք էր նույն Աբովյանում համագործակցել տարբեր ուժերի հետ, կոնսուլտացիաներ իրականացնել և միասնական դիրքորոշում մշակելով գնալ ընտրության։
Բայց իրենց շտաբը, կրկնում եմ, քաղաքական անփորձության պատճառով չգնաց դրան և ավելի լավ չպատրաստվելու արդյունքում պարտություն գրանցեց»,- նշեց Ոսկերչյանը։
Ամեն դեպքում, Աբովյանի նախկին քաղաքապետը նշեց, որ Աբովյանում գործող քաղաքապետը բացասական համբավ չունի, որը կարող էր մարդկանց ստիպել գնալ իրեն մերժելու ճանապարհով։
