«Քաղաքացու որոշում» սոցիալ-դեմոկրատական կուսակցությունը դիմել էր տարբեր ատյաններ ԲՀԿ նախագահ Գագիկ Ծառուկյանի բիզնես գրծունեության և պատգամավորության անհամատեղելիության հիմնավոր կասկածներով՝ կից ներկայացնելով ապացույցներ:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության ԳՄ անդամ Գարեգին Միսկարյանը և «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:
Այս գործընթացի հետ կապված՝ ի՞նչ արձագանքներ կան: Անդրադառնալով այս հարցին՝ Գ. Միսկարյանը նշեց. «Դիմել էինք Դատախազություն, որը դիմումն ուղարկել էր ՀՔԾ, ՀՔԾ-ն մերժեց քրեական գործի հարուցումը՝ հիմքերի բացակայության պատճառով, Դատախազությունը նույնպես մերժեց: Մենք նաև ԱԺ նախագահին էինք դիմել, և այդպես է պատասխան չենք ստացել: «Իմ քայլը» խմբակցության ղեկավարն է պատասխանել՝ նշելով, որ նպատակահարմար չէ էթիկայի հանձնաժողով ստեղծելն այդ հարցով: Դիմել էինք ԱԺ ընդդիմադիր կուսակցություններից «Լուսավոր Հայաստան»-ին, նրանք նույնպես նպատակահարմար չեն գտնում, այսինքն՝ այս հարցը գնում է փակուղի»:
«Մեր հետագա քայլերի հարցը դեռ քննարկումների փուլում է, բայց վստահ եմ, որ մենք կանգ չենք առնելու, հետևողական են գտնվելու այդ խնդրի լուծման հարցում, մենք գտնում ենք, որ ՀՀ-ում օլիգարխիան տեղ չունի»,- ընդգծեց ՔՈ անդամը:
Դանիել Իոաննիսյանի խոսքով՝ իր տեղեկություններով կառավարությում չկա որևէ անդամ, որը փաստացի գործարար գործունեությամբ է զբաղվում. «Բայց Ազգային ժողովի պարագայում միամտություն կլինի ասել, որ չկա: Օրինակ՝ Գագիկ Ծառուկյանի հրապարակային ելույթները ակնհայտորեն վերաբերում են իր մասնակցությանը գործարար գործունեությանը: Հավատարմագրային կառավարման հանձնելը չպետք է լինի զուտ ֆորմալ: Գ. Ծառուկյանի խոսքերից դատելով՝ կարող ենք ասել, որ նա շարունակում է կառավարել մի շարք ձեռնարկություններ, սա իրոք անհամատեղելի է պատգամավորի գործունեության հետ»:
Դ. Իոաննիսյանի կարծիքով՝ մտահոգիչ է այն, որ խորհրդարանում այդ առումով անգամ չստեղծվեց էթիկայի հանձնաժողով. «Տպավորություն է ստեղծվում, որ քաղաքական նպատակահարմարությունն ավելի առաջնային է օրենքի, Սահմանադրության պահանջներից»:
Մանրամասն՝ տեսանյութում:
