Միացյալ Նահանգների և Իրանի հարաբերություններում լարվածությունը վերջին օրերին հասել է իր գագաթնակետին: Հունիսի 20-ի առավոտյան Իրանի «Իսլամական հեղափոխության պահապանների կորպուսը» խոցել է Պարսից ծոցի շրջանում տեղակայված ամերիկյան ստորաբաժանումներից մեկի կազմում գործող անօդաչու թռչող սարքը: Իսկ այսօր էլ տեղեկություններ հրապարակվեցին այն մասին, որ միջադեպից հետո ԱՄՆ նախագահ Թրամփը հրահանգել է հարվածել Իրանին, սակայն հետո հետ է կանգնել այդ որոշումից: Թեմայի շուրջ «Առաջին լրատվական»-ը զրուցել է Օրբելի կենտրոնի փորձագետ Կարեն Վերանյանի և իրանագետ Ահարոն Վարդանյանի հետ։
«Ճգնաժամը, որն այսօր մի քիչ ավելի հասունացել է, ընթացքի մեջ է ավելի քան երկու տասնամյակ՝ ԱՄՆ-Իրան, Իսրայել-Իրան հակամարտության տեսքով, ինչը բնորոշ է պրոքսի պատերազմներին։ Առաջին անգամը չէ, որ Իրանը կանգնած է նման ճգնաժամային իրավիճակի առաջ, կարծում եմ, որ, նախ, Միացյալ Նահանգները կխուսափի ուղիղ ռազմական հարվածներից, որովհետև դա իրանական ճահիճ կդառնա ԱՄՆ-ի համար, որովհետև քանիցս նշվել է, որ Իրանը Իրաքը չէ, Սիրիա չէ, մի երկիր է, որ ցանցային հստակ ազդեցություն ունի տարբեր ոլորտներում՝ ինչպես Մերձավոր Արևելքում, այնպես էլ, առհասարակ, միջազգային հարաբերություններում»,- ասաց Վերանյանը՝ միևնույն ժամանակ չբացառելով ուղիղ հարվածների հավանականությունը:
Վարդանյանը ևս քիչ հավանական է համարում Իրանի և ԱՄՆ-ի միջև ռազմական ուղիղ բախումը․«Հաշվի առնելով Միացյալ Նահանգների ներկայիս ղեկավարի էքսցենտրիկ բնավորությունը, անկանխատեսելիությունը՝ չի բացառվում ուղիղ հարվածները, բայց ամերիկյան կողմը պետք է հասկանա այդ ուղիղ հարվածների պատասխանը: Իրանը Մերձավոր Արևելքում ունի ահռելի ազդեցություն, այսօր երևի թե աշխարհում չկա նման մի պետություն, որը կկարողանա իր ազդեցությամբ, հնարավորություններով մրցակցել Իրանի հետ Մերձավոր Արևելքում և այս տարածաշրջանում: Իրանը կկարողանա շատ հզոր հարվածներ հասցնել տարածաշրջանում Միացյալ Նահանգների դաշնակից պետություններին և գործընկերներին:»
Հարցին՝ թե Ադրբեջանը ինչպես կարող է օգտագործել տարածաշրջանում ստեղծված ընդհանուր իրավիճակը արցախյան հիմնահարցի համատեքստում, Վարդանյանը պատասխանեց. «Պաշտոնական Բաքուն կարող է օգտվել առիթից, որովհետև Իրանը զբաղված լինելով արտաքին մարտահրավերներով, ներքին խնդիրներով, չի կարողանալու պատշաճ ուշադրություն դարձնել իր հյուսիսային սահմաններին, ուստի, շատ հնարավոր է՝ պաշտոնական Բաքուն օգտվի իրավիճակից: Այստեղ մի խնդիր էլ կա՝ Նախիջևանի խնդիրը: Իրանը շատ զգայուն է Նախիջևանի հարցում… Համենայնդեպս, Հայաստանը պետք է աչալրջորեն հետևի, պատկան մարմինները պետք է փորձեն ճիշտ կողմնորոշվել և դիրքավորվել»:
Վերանյանն էլ իր հերթին ընդգծեց, որ Ադրբեջանից բացի, տարածաշրջանում անկայունության մթնոլորտ ստեղծելու հարցում շահագրգռված է նաև Անկարան: «Մենք տեսնում ենք, որ որոշակի խնդիրներ կան S-400-ների գործարքի մասով ԱՄՆ-ի հետ, և Թուրքիան կփորձի օգտագործել ստեղված իրավիճակը՝ խառնելով բոլորի, առաջին հերթին՝ Թրամփի խաղաքարտերը, ստանալով առավելագույնը թե՛ Ռուսաստանից, թե՛ ԱՄՆ-ից, թե՛ Վաշինգտոն-Թեհրան հակամարտությունից»: