Հետոխրհրդային տարածաշրջանում ամրապնդվելու ՌԴ-ի վերջին հնարավորությունն Ուկրաինայից բացի մյուս երկրների վրա կենտրոնանալն է: Այսօր «Առաջին լրատվական»-ի Realpolitik հաղորդաշարի տաղավարում «Ղրիմ. վե՞րջ, թե՞ սկիզբ» խորագրով ուղիղ հեռարձակմամբ քննարկման ժամանակ նման տեսակետ հայտնեց քաղաքագիտության դոկտոր Հայկ Մարտիրոսյանը` անդրադառնալով ուկրաինական իրադարձությունների միջազգային արձագանքի համարժեքությանն ու արդյունավետությանը:
Հայկ Մարտիրոսյանի կարծիքով՝ միջազգային հանրության արձագանքը համարժեք էր, եթե չասենք՝ ուժգին, այն առումով, որ այլ արձագանք դժվար էր սպասել Արևմուտքից: Ըստ նրա՝ պետք էր ինչ-որ կերպ արձագանքել, քանի որ լռությունը տարօրինակ կլիներ: «Սակայն կարծում եմ, որ բոլորն էլ լավ հասկանում են` ինչ է տեղի ունենում, և ինչ արդյունք է լինելու: Արձագանքը համաչափ էր, և թերևս՝ նաև զուսպ»,- ասաց քաղաքագիտության դոկտորը:
Նա նաև նշեց, որ ԱՄՆ-ում հասկանում են, որ ՌԴ նախագահին այս հարցում կասեցնելն անհնար է: Ինչ վերաբերում է Օբամային ուղղված հանրապետականների մեղադրանքներին, ապա, ըստ Հայկ Մարտիրոսյանի, Սպիտակ տանը և ԱՄՆ նախագահին հանրապետականները մեղադրում են ամեն ինչում և ամեն ինչի համար: «Կուզեի մի հետաքրքիր հանգամանք նշել, որ Օբամային իր հակառակորդները մեղադրում են թուլության մեջ և ոչ համարժեքության մեջ, իսկ ես կարծում եմ, որ նրա զսպվածությունը խոսում է ուժեղության մասին, քանի որ նա չի հանձնվում իր վրա կիրառվող ծանր ճնշումներին և վարում է հավասարակշռված քաղաքականություն»,- նշեց նա` շարունակելով, որ Եվրոպան նույնպես շահերից ելնելով չէր կարող լուռ մնալ, սակայն առավել սուր ևս չի կարող լինել: Եվրոպայի քայլերն ավելի զուսպ պետք է լինեին, քան ԱՄՆ-ի պարագայում, քանի որ Եվրոպայի կախվածությունը ՌԴ-ից ավելի մեծ է, քան ԱՄՆ-ի դեպքում:
Բանախոսի համոզմամբ` ՌԴ-ի դեմ պատժամիջոցներ կլինեն, բայց այնպիսին, որպեսզի չգրգռեն ՌԴ-ին: «Առաջին անգամն է, որ ամերկյան ազգային հիմնական հեռուստաալիքներով խոսվում է, որ ՌԴ-ն պատմականորեն արդարացված հավակնություններ ունի Ղրիմի նկատմամբ: Ամերիկյան վերնախավում և մամուլում շատ լավ հասկանում են, որ այս իրավիճակում ՌԴ քայլերը կոշտ են լինելու, և առճակատումը դրական արդյունքի չի կարող բերել: Հետևաբար պատժամիջոցները կլինեն այնպիսին, որ շատ չգրգռեն ՌԴ-ին»,- մեկնաբանեց Հայկ Մարտիրոսյանը:
Անդրադառնալով ՌԴ-ի նախաձեռնած ինտեգրացիոն գործընթացներին հետխորհրդային տարածքում` քաղաքագետն ասաց, որ դրանք այսօր շատ ավելի իրականանալի են, քան Ուկրաինայի հնարավոր անդամակցության պարագայում: ՌԴ-ն, նրա խոսքով, իր շահերից ելնելով, կկենտրոնանա այլ երկրների վրա, այլընտրանք չունի, իր վերջին շանսն է ամրապնդվելու տարածաշրջանում:
