WikiLeaks-ը շարունակում է Հայաստանին վերաբերող նոր փաստաթղթեր գաղտնազերծել: Կայքի հրապարակած հերթական փաստաթուղթը հայ-իրանական հարաբերությունների մանրամասն վերլուծությունն է՝ պատրաստված Բաքվում ԱՄՆ դեսպանության աշխատակիցների կողմից:
«Ազատություն» ռ/կ-ի փոխանցմամբ՝ այն, որ փաստաթուղթը պատրաստվել է Բաքվում, պատահական չէ. Հարավային Կովկասում Իրանի մասին տեղեկություններ հավաքող ամերիկացի դիվանագետի նստավայրը հենց Ադրբեջանի մայրաքաղաքն է: Ինչպես հաղորդագրության նախաբանում տեղեկացնում է Բաքվում ԱՄՆ նախկի դեսպան Էնն Դերսին, Իրանի խնդիրներով զբաղվող իր ենթական Երևան էր ժամանել 2007 թ. հոկտեմբերին՝ հանդիպելով քաղաքական շրջանակների, գործարարների և մշակութային գործիչների հետ:
«Հայ փորձագետները համոզված են, որ Իրանի միջուկային նկրտումներն անկասելի են: Բացի այդ, հայ մասնագետները հանդիպումների ընթացքում համոզմունք են հայտնել, որ Իրանը մեծապես շահագրգռված է տարածաշրջանային ստատուս քվոյի՝ մասնավորապես ԼՂ խնդրի շուրջ ներկա կացության պահպանմամբ»,- նշված է հաղորդագրության մեջ:
Այնուհետև դիվանագետները բավական մանրամասն տեղեկություններ են հաղորդում երևանյան փորձագիտական շրջանակներում տիրող տրամադրությունների մասին: «Արտաքին հարաբերություններով զբաղվող փորձագետների և գիտնականների շրջանակը համոզված է, որ Միացյալ Նահանգները շատ քիչ բան կարող է անել Իրանի միջուկային ծրագիրը արգելակելու համար:
Ազգային անվտանգության նախկին նախարար Դավիթ Շահնազարյանը, որը նաև Հայոց համազգային շարժման հիմնադիրներից մեկն է, ամերիկացի դիվանագետների հետ զրույցում ասել է, թե Իրանի տնտեսությունն այնքան թույլ չէ, որ պաշտոնական Թեհրանը ստիպված լինի փոխել իր քաղաքականությունը»,- նշված է հաղորդագրության մեջ: Ինչ վերաբերում է ԱՄՆ կողմից հնարավոր ռազմական հարվածներին, ապա դրանք, ըստ հաղորդագրության, Դ.Շահնազարյանը բնութագրել է որպես «ոչ խելամիտ քայլ»: «Եթե նույնիսկ ԱՄՆ-ը ռազմական հաջողությունների հասնի, ապա դրանց կհետևեն շատ մեծ քաղաքական խնդիրները»,- նշել է հայաստանցի փորձագետը:
Դ.Շահնազարյանը ամերիկացի դիվանագետների հետ զրույցում խոսել է նաև հայ-իրանական երկկողմ հարաբերությունների մասին: «Իրանի և Հայաստանի հարաբերությունները չեն սահմանափակվում միայն առևտրային կապերով: Գոյություն ունի քաղաքական խնդիրների շուրջ և անվտանգության բնագավառում բարձր մակարդակի համագործակցություն»,- նշել է Շահնազարյանը՝ հատուկ ընդգծելով, որ Իրանը չի ցանկանում առաջընթաց տեսնել Ղարաբաղի խնդրի լուծման ճանապարհին, քանի որ դա պաշտոնական Թեհրանին թույլ է տալիս շեղել Ադրբեջանի ուշադրությունը Իրանի հյուսիսում ապրող ադրբեջանցիների խնդիրներից:
