Վրացական GHN լրատվական գործակալության փոխանցմամբ՝ Բաթումի քաղաքային դատարանը կայացրել է Ռուսաստանի օգտին լրտեսության մեղադրանքով ձերբակալված 9 անձանց դատավճիռը։ Ձերբակալվածները, որոնց թվում եղել են նաև Ռուսաստանի քաղաքացիներ, դատապարտվել են 11-14 տարվա ազատազրկման։
Մասնավորապես, 11-ամյա ազատազրկման են դատապարտվել Ռուսաստանի երկու քաղաքացիներ։ Խոսքը գնում է «Սեյբոլտ» ընկերության գլխավոր տնօրեն Արմեն Գևորգյանի և ընկերության մասնաճյուղերից մեկի փոխտնօրեն Ռուբեն Շիկոյանի մասին։
Վրաստանի ՆԳՆ-ի տվյալներով՝ Գևորգյանը Ռուսաստանի Գլխավոր հետախուզական վարչությանը (ԳՀՎ) տրամադրել է Վրաստանի զինված ուժերի մասին օպերատիվ տեղեկատվություն, իսկ Շիկոյանը զբաղվել է գաղտնի տեղեկատվության գնմամբ։
11-ամյա ազատազրկում են ստացել նաև 3 օդաչուներ՝ Դավիթ Մեսխիձեն, Տարիել Աբաշիձեն և Գոչա Դիասամիձեն, ինչպես նաև ռադիո մասնագետ Էդուարդ Աբդուլաևը։
13.5-ամյա ազատազրկման է դատապարտվել օդաչու Գելա Կաբաձեն, իսկ ԳՀՎ-ի հետ կապեր ունենալու համար 14-ամյա ազատազրկման են դատապարտվել Յուրի Սկռիլնիկովը և Ռուսլան Գալոգրեն։
Հիշեցնենք, որ Ռուսաստանի հատուկ ծառայությունների հետ համագործակցած վերոնշյալ խումբը ձերբակալվել է նախորդ տարվա նոյեմբերին՝ Վրաստանի ՆԳՆ-ի իրականացրած «Էնվեր» անվանմամբ գործողության ընթացքում։