Ադրբեջանական Salam News գործակալության փոխանցմամբ՝ այսօր Թուրքիայի Ազգային մեծ ժողովի (ԹԱՄԺ) նորընտիր նախագահ Ջեմիլ Չիչեքը հանդիպում է ունեցել թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուի հետ։
Հանդիպման գլխավոր թեման այն է, որ ԺՀԿ-ն հրաժարվում է ԹԱՄԺ-ում մասնակցել երդման արարողությանը՝ դա պատճառաբանելով իր երկու նորընտիր պատգամավորների դեռևս բանտում գտնվելու հանգամանքով։
Հանդիպումից առաջ պատասխանելով լրագրողների հարցերին՝ Քըլըչդարօղլուն հայտարարել է. «Մենք պատրաստ ենք խորհրդարանում մասնակցել երդման արարողությանը, եթե մեզ որոշակի երաշխիքներ տրվեն բանտում գտնվող պատգամավորների կապակցությամբ։ Երդման արարողությունից հրաժարվելով՝ մենք ողջ աշխարհին ի ցույց դրեցինք մեր ժողովրդավարության ու իրավունքի ամոթը»։
Հիշեցնենք, որ նորընտիր ընդդիմադիր պատգամավորների երդման արարողության վերջնաժամկետը սպառվում է հուլիսի 15-ին։ ԺՀԿ-ն պահանջում է անհապաղ ազատել «Էրգենեկոն» ահաբեկչական կազմակերպության գործով կասկածյալներ և իր նորընտիր պատգամավորներ Մեհմեթ Հաբերալին ու Մուսթաֆա Բալբային։
