Ծխող աշխատակիցները 18%-ով ավելի թանկ են արժենում իրենց ընկերություններին, քան չծխողները: Այս մասին հաղորդում է Bloomberg Businessweek-ը՝ հղում անելով Aon Hewitt ընկերությանը:
Այսպիսով, ամերիկյան խոշոր ընկերությունները սկսում են ներմուծել լրացուցիչ ապահովագրական տուրքեր իրենց ծխող աշխատակիցների համար, իսկ որոշ ընկերություններ էլ ընդհանրապես հրաժարվում են ծխողներին աշխատանքի ընդունել: Մեծածախ ապրանքների ամերիկյան Macy’s ցանցը հուլիսի 1-ից ներդրել է նոր կորպորատիվ օրենք, որի համաձայն՝ ծխող աշխատակիցները ստիպված են ամսական վճարել 35 դոլար կամ տարեկան 420 դոլար:
Իսկ նրանց համար, ովքեր հաճախում են անվճար կուրսեր, որտեղ մասնագետները օգնում են մարդուն հրաժարվել ծխելուց, պարտադիր մուծումների ժամկետն ավելացվում է: Ամեն ինչ կախված է առաջընթացից, որը կգնահատվի կուրսերը սկսելուց կես տարի հետո:
PepsiCo ընկերության կին ծխողները տարեկան վճարում են 600 դոլար, իսկ Gannett հրատարակչությունում այդ գումարը կազմում է ամսական 60 դոլար:
Union Pacific և Scotts Miracle-Gro ընկերությունները փաստորեն հրաժարվում են աշխատանքի ընդունել ծխողներին:
Ինչպես հայտնում է ԱՄՆ-ի հիվանդությունների դեմ պայքարի կենտրոնը, ծխելը տարեկան երկրին արժենում է 193 մլրդ դոլար: Բացի այդ, ամեն հինգերորդ մահացության պատճառն ԱՄՆ-ում ծխելն է: