«Սևի և սպիտակի միջև կան բազմաթիվ այլ երանգներ»,- Վաշինգտոնում կայացած քննարկման ժամանակ հայտարարել է Ադրբեջանի նախագահի արտաքին հարցերով խորհրդական Հիքմեդ Հաջիևը։ Հաջիևը նաև ասել է՝ գնահատականներ տալուց առաջ անհրաժեշտ է հասկանալ այն աշխարհաքաղաքական իրականությունը, որում գտնվում է Ադրբեջանը։
Վերադառնալով Ղարաբաղյան կարգավորման հարցին, Հաջիևը նշել է, որ այնքան ժամանակ, քանի դեռ այն կարգավորված չէ, Հայաստանը մնալու է մեկուսացված։ Նա նաև նշել է, որ Խորհրդային միության տարիներին Հայաստանի կոմունիկացիաների 80 տոկոսն անցնում էր Ադրբեջանով, և այսօր էլ Ադրբեջանը կարող է ստանձնել այդ դերը, որի գինը մեկն է՝ Մադրիդյան սկզբունքների կատարումը, որի հիմքում տարածքների վերադարձն է։ Փաստացի նա կրկնել է այն բանաձևը, որը հաճախ օգտագործվում էր նախկին իշխանությունների կողմից՝ «Հողեր խաղաղության դիմաց», պարզապես նա վերաձևակերպել է այն՝ «հողեր բարգավաճման դիմաց»։ «Առաջին լրատվական»-ի զրույցում Արցախի արտաքին գործերի նախկին նախարար Արման Մելիքյանն ասաց․ «Դա նոր մոտեցում չի։ 1990-ականներն էլ ադրբեջանական կողմը միշտ փորձում էր համոզել արցախահայությանը, համայն հայությանը, որ Արցախի համար լավագույն ապագան Ադրբեջանի կազմում մնալն է, որովհետև այդ դեպքում Արցախը կարող է բարգավաճել․ թվեր էին բերում, թե որքան գումար կներդնեն Արցախի զարգացման համար։ Բայց այդ բոլորը որևէ արժեք չունի, երբ համեմատում ենք հայ բնակչության անվտանգության խնդրի հետ։ Այսինքն՝ նրանք կարող են խոստումներ տալ, բայց պատմությունը ցույց տվեց, որ նրանք քաղաքական խնդիրներն արյամբ լուծելու սովորություն ունեն, այդ սովորությունից նրանք դուրս չեն եկել և դուրս գալու միտում անգամ չունեն։ Այսինքն, մեծ հաշվով, «փրկագին են տալիս» Արցախում իրենց ուզածը հետագայում անելու համար։ Մենք չպետք է խաբվենք այդ խոստումներին, ու դրանք կենսունակ չեն լինելու։ Եթե գումարներ էլ ներդնեն, ապա միայն Արցախ ադրբեջանական բնակչություն բերելու նպատակով։ Ուստի, սա լուրջ խոսակցություն չէ»։
«Նախ մենք պետք է պարզաբանենք, թե ինչ է Արցախի ադրբեջանական համայնքը։ Առհասարակ, նույնիսկ ԼՂԻՄ-ն անգամ համայնքային կազմ չի ունեցել, վերջին 100 տարում Արցախը նման կառուցվածք չի ունեցել։ Արցախը եղել է հայաբնակ՝ զուտ հայկական տարածք հայկական ավանդույթներով, հայկական պատմությամբ, որի մասին բազմաթիվ վկայություններ կան»,- հավելեց Արման Մելիքյանը։
Մանրամասները՝ տեսանյութում։