Այսօր Խ. Աբովյանի անվան մանկավարժական համալսարանում տեղի ունեցավ լրագրող, հրապարակախոս Արմեն Հովհաննիսյանի անվան ուսումնական ստուդիայի բացման հանդիսավոր արարողությունը: Արարողությանը ներկա էին ՀՀ մշակույթի նախարար Հասմիկ Պողոսյանը, բուհի ռեկտոր Ռուբեն Միրզախանյանը և պրոֆեսորադասախոսական կազմի ներկայացուցիչներ:
Նախարարի ուշադրությանը ներկայացվեցին ուսումնական ստուդիայի ուսանողների պատրաստած հեռուստահաղորդումների դիտման սրահը, խմբագրական և տեսամոնտաժման սրահները՝ հագեցած համակարգչային և մասնագիտական այլ սարքավորումներով:
Համալսարանում այսօր բացվեց նաև պետական-մշակութային գործիչ Ստեփան Պողոսյանի անվան հեռուստալրագրության լսարանը, որի մասին խոսելիս Ռուբեն Միրզախանյանը նշեց, որ միշտ գոյություն ունեցած այս լսարանն այսօրվանից նոր շունչ ու հոգի է ստանալու:
«Լսարանը վերազինված է համակարգիչներով և ժամանակակից այլ տեխնիկայով, որից կարող են օգտվել ոչ միայն Խ. Աբովյանի անվան պետական մանկավարժական համալսարանի, այլև մյուս բուհերի ուսանողները»,- ասաց նա:
Լրագրողները միջոցառմանը ներկա մշակույթի նախարարից հետաքրքրվեցին նաև Գառնու տաճարի շրջակայքում սրճարան կառուցելու իսկությանմբ, ինչին ի պատասխան՝ Հասմիկ Պողոսյանն ասաց. «Սրճարան չէր էլ կառուցվում: Չգիտեմ՝ ինչն էր պատճառը, որ այս թեմայի շուրջ այսքան մեծ աղմուկ բարձրացավ: Չկա մի դեպք, որ մշակույթի նախարարությունը հնագիտական որևէ շերտ ոչնչացնի: Գառնու տաճարի տարածքում լանդշաֆտի ոչ մի խախտում չկա: Իսկ այն հենապատը, որ շարվում է, ուղղակի պետք է շարվեր»,- ասաց նա` հավելելով, որ դեռ 2010-ին, մշակութային արժեքների պահպանության համար Գառնու տաճարը ՅՈՒՆԵՍԿՕ-ի կողմից մրցանակի է արժանացել:
