Այս պահին Արագածոտնի մարզի 8 գյուղերի բնակիչներ հավաքվում են Օհանավան գյուղում՝ պահանջելու դադարեցնել ՀԷԿ-ի շինարարական աշխատանքները:
Պարզվում է, որ թեև մի քանի օր առաջ նրանք հանդիպել էին ոստիկանապետ Վլադիմիր Գասպարյանի հետ, ով հեռախոսազրույց էր ունեցել Սերժ Սարգսյանի հետ, ներկայացրել բնակիչների պահանջները, իսկ Սերժ Սարգսյանն էլ ասել էր, թե ՀԷԿ-ը չի կառուցվելու, այնուամենայնիվ՝ տարածք նոր խողովակներ են բերվել:
«Առաջին լրատվական»-ի հետ զրույցում նրանք նշեցին, որ իրենց պահանջը մեկն է՝ ՀԷԿ-ը չի կառուցվելու, և իրենք կանեն ամեն հնարավորը՝ կասեցնելու այն:
«Մեզ չեն թողնում մեր երկրում ապրենք, հող մշակենք»,- վրդովված նշեցին բնակիչները:
Այս անգամ բողոքի ակցիային մասնակցում են ավելի մեծ թվով բնակիչներ, քան նախորդ ակցիայի ժամանակ էր:
Ակցիային մասնակցում են բնակիչներ՝ Ապարանից, Ուշիից, Կարբիից, Սաղմոսավանից, Օհանավանից, Երզնկայից և Եղվարդից: Ժամը 11.00-ին բնակիչներին խոստացել են հանդիպում կառավարության անդամների հետ, ովքեր Երևանից ժամանելու են Ապարան: Հանձնաժողովի եզրակացությունը բնակիչներին չի հետաքրքրում, նրանք պահանջում են դադարեցնել ՀԷԿ-ի կառուցումը, հակառակ դեպքում՝ «մարտի 1-ից էլ բեթար բան կլինի»:
