ՊՎԾ-ն հաղորդագրություն է տարածել այն մասին, որ Մխիթար Հերացու անվան ԵՊԲՀ-ում իրականացված ուսումնասիրությունների արդյունքում հայտնաբերվել են խնդիրներ գնումների ընթացակարգի կազմակերպման, լրացուցիչ աշխատավարձերի հաշվարկման, շինարարական աշխատանքների կազմակերպման գործընթացներում: Գործն ուղարկվել է Գլխավոր դատախազություն: Թեմայի շուրջ «Առաջին լրատվական»-ի հետ զրույցում իր դիտարկումները ներկայացրեց ԵՊԲՀ ռեկտոր Արմեն Մուրադյանը: Նրա խոսքով՝ կատարվել է պլանային աշխատանք: Ռեկտորի հավաստմամբ՝ չորս տարվա ընթացքում կատարված աշխատանքը վիթխարի ծավալների է հասնում, շրջանառությունը հասել է 53 միլիարդի, արտասահմանցի ուսանողների թիվը հասել է 1700-ի:
ԵՊԲՀ-ում շուրջ 6 ամիս ուսումնասիրություններ են իրականացվել՝ ուսումնասիրության ժամանակահատվածն է եղել 2015-2018 թվականները: Ա. Մուրադյանի հավաստմամբ՝ բաց, գործընկերային աշխատանք է իրականացվել: Ռեկտորի խոսքով՝ զարմանք է առաջացնում այն, որ ժամանակ են տալիս, որ ԵՊԲՀ-ն մինչև հունիսի 15-ը ներկայացնի իր պատասխանը, բայց իրենք անսպասելի հայտարարություն են տարածում՝ տեղեկանքից ծաղկաքաղ արված նախադասություններ ներկայացնելով հանրությանը:
ԵՊԲՀ-ի հաղորդագրության մեջ նշված է. «ՊՎԾ-ի տեղեկանքում հստակ արձանագրված են ԵՊԲՀ-ի տարբեր ստորաբաժանումների աշխատանքների կազմակերպման բարելավումները՝ թե՛ ֆինանսական, թե՛ կազմակերպչական, միգուցե կա՛մ տեխնիկական բացթողում է եղել դրանց չարձանագրումը ՊՎԾ-ի հայտարարության մեջ, կա՛մ ՊՎԾ-ն աշխատաքային նման գործելաոճ է որդեգրել՝ խոսել միայն բացթողումների մասին՝ չսպասելով համապաստախան պատասխանին»: Արմեն Մուրադյանը հույս հայտնեց, որ բարելավումների մասին չարձանագրելը, թերևս, բացթողում է եղել:
Անդրադառնալով դիտարկմանը, որ շատերը այստեղ ևս քաղաքական հետագիծ են տեսնում, ռեկտորն ընդգծեց, որ չպետք է շահարկել այս հարցը. «Բուհերը ապաքաղաքականացված են, բժշկի աշխատանքը քաղաքականությունից դուրս աշխատանք է…»:
Ա. Մուրադյանը նաև ընդգծեց, որ եթե այսպես վերաբերվեն մեր բժիշկներին, 10-15 տարի հետո կմնանք «խոպանչի» բժիշկների հույսին:
Մանրամասն՝ տեսանյութում: