Այսօր՝ հունիսի 11-ին «Առաջին լրատվական»-ը հրապարակել է «Խայտառակ գործարքի հետևանքը. Հազարավոր մարդիկ չեն կարողանում դիտել ՀՀ ազգային հավաքականի ելույթները» վերտառությաբ նյութ, որում առկա են «Արմենիա» հեռուստաընկերության վերաբերյալ ձևակերպումներ:
Մեր հրապարակման հետ կապված «Արմենիա» հեռուստաընկերությունից հանդես են եկել պարզաբանումով, որը ներկայացնում ենք ստորև.
«Հայտնում ենք Ձեզ, որ «Արմենիա» հեռուստաընկերությունը հասանելի է Հայաստանի Հանրապետության ողջ տարածքում` բացարձակ անվճար և ամենաբարձր՝ Full HD որակով:
Եվ անկախ այն հանգմանքից, քաղաքացին հանդիսանում է կաբելային հեռարձակման բաժանորդ, թե ոչ, Հայաստանի յուրաքանչյուր կետում, բաց եթերով, անվճար կարող է դիտել «Արմենիա» հեռուստաընկերության բոլոր հեռարձակումները, այդ թվում՝ ՀՀ ազգային հավաքականի խաղերը:
Հրապարակման մեջ առկա պնդումը, թե հեռուստաալիքների թվայնացումից հետո «Արմենիա» կարող են դիտել միայն Ucom ընկերության բաժանորդները, ապատեղեկատվություն է:
Եթե քաղաքացին օգտվում է վճարովի ծառայություն տրամադրող որևէ ընկերությունից, որի փաթեթում «Արմենիա» հեռուստաընկերությունը ներառված չէ, դրանում հեռուստաընկերությանը մեղադրելն առնվազն անհասկանալի է, քանի որ, կրկնում ենք, «Արմենիա» հեռուստաընկերությունը հեռարձակվում է բաց եթերով՝ բացարձակ անվճար:
Խնդրում ենք զերծ մնալ բազմահազար լսարան ունեցող, հայկական առաջատար հեռուստաընկերության բարի համբավն արտավորելու փորձեր պարունակող հրապարակումներից: Համոզված ենք, որ հրապարակման մեջ առկա անճշտությունները ոչ թե չարամտության, այլ լրագրողի անտեղյակության հետևանք են, ուստի վերահաստատում ենք «Արմենիա» հեռուստաընկերությանը վերաբերող ցանկացած տեղեկության հրապարակումից առաջ լրագրողների հետ աշխատելու մեր պատրաստականությունը:
Հարգանքով՝
«Արմենիա» հեռուստաընկերության
PR պատասխանատու Հայկուհի Ասատրյան»:
